Tennıs: Tımofeı Skatov Almaty týrnıriniń fınalyna shyqty
NUR-SULTAN. QazAqparat – Qazaqstandyq Tımofeı Skatov Almaty chellendjer týrnıriniń fınalyna shyqty, dep habarlaıdy QazAqparat tilshisi.
Dúnıejúzilik reıtıngte 399-orynda turǵan 20 jastaǵy qazaqstandyq tennısshi jartylaı fınalda óziniń qurdasy, álemniń 279-raketkasy, taıbeılik Tszen Tszenmen sheberlik
baıqasty.
Jasóspirim kezderinde ekeýi de tabysty óner kórsetip, ózara bir ret kezdesip, onda taıbeılik tennısshi jeńiske jetken eken.
Birinshi partııada T.Skatov bastap dop berdi. Tartysty geımde qarsylasy bes birdeı breık-poıntty paıdalana almady. Esesine sosyn qazaqstandyq tennısshi qos breık jasap, esepti 5:1-ge jetkizdi. Budan keıin taıbeılik sportshy breık jasady. Degenmen Tımofeı bul setti taǵy bir breıkpen támamdady – 6:2.
Ekinshi sette esep 2:1 bolǵan mezette qazaqstandyq sportshy breık jasaǵanymen, qarsylasy sol boıda ese qaıyrdy. Esep 4:3 bolǵanda, T.Skatov taǵy bir breıkke qol jetkizdi. Sosyn matchqa dop bergende, óz múmkindigin jibergen joq – 6:3.
Báseke 1 saǵat 31 mınýtqa sozyldy.
T.Skatov fınalda taǵy bir qazaqstandyq Dmıtrıı Popko nemese belgııalyq Zızý Bergstiń bireýimen bas júldeni sarapqa salady.
Eske sala keteıik, budan buryn T.Skatovtyń Almaty týrnıriniń jartylaı fınalyna shyqqanyn, D.Popkonyń osy jarysta birinshi raketkany utqanyn jazǵan bolatynbyz.
Sondaı-aq qazaqstandyq tennısshi Bratıslavadaǵy týrnırdiń fınalyna shyqty.
