Tennıs: Taǵy bir qazaqstandyq halyqaralyq týrnırdiń jeńimpazy atandy
ASTANA. QazAqparat - Qazaqstandyq Aleksandr Býblık Bratıslava(Slovakııa) chellendjer týrnıriniń jeńimpazy atandy, dep habarlaıdy QazAqparat tilshisi.
Dúnıejúzilik reıtıngte 253-orynda turǵan A.Býblık fınalda álemniń 164-raketkasy, chehııalyq Lýkash Rosolmen kúsh synasty.
L.Rosol 33 jastaǵy tájirıbeli tennısshi bolsa, A.Býblık 21 jasta ǵana. Soǵan qaramastan, qazaqstandyq tennısshi sheberlik tanyta bilip, eki partııany da 6:4 esebimen utty.
Kezdesý 1 saǵat 9 mınýtqa sozyldy.
Týrnır barysynda A.Býblık ózinen reıtıngte áldeqaıda joǵary turǵan slovakııalyq Andreı Martın, ıtalııalyq Lorentso Sonego, ýkraınalyq Sergeı Stahovskıı jáne jartylaı fınalda germanııalyq Mattıas Bahıngerdi tize búktirdi.
Eske sala keteıik, budan buryn taǵy bir qazaqstandyq Galına Voskoboevanyń juptyq synda Lımoj týrnıriniń jeńimpazy atanǵanyn jazǵan bolatynbyz.
