Tennıs: Shvedova juptyq synda Tokıo týrnıriniń jartylaı fınalyna ótti
ASTANA. 29 qyrkúıek. QazAqparat - Qazaqstandyq tennısshi ıA.Shvedova amerıkandyq V.Kıngpen juptasyp, Japonııada ótip jatqan «Toray Pan Pacific Open» týrnıriniń jartylaı fınalyna shyqty, dep habarlady QR Tennıs federatsııasynyń baspasóz qyzmetinen.
Atalmysh týrnır 1984 jyldan beri Japonııa astanasynda ótkizilip keledi. Onyń júlde qory - 2 mıllıon 50 myń AQSh dollaryn quraıdy. Shvedova jaraqatyna baılanysty bul týrnırde jekeleı synnan bas tartqan bolatyn. Al juptyq synda ol óziniń baǵyn synaýǵa bel sheship, buryńǵy áriptesi amerıkalyq V. Kıngpen birge kort alańyna shyqty. Búgin, beısenbide Shvedova men Kıng shırek fınalda Natalı Grandın (ıÝAR) men Vladımıra Ýhlırova (Chehııa) jubyn 6:4, 6:4 esebimen jeńdi.
Olardyń jartylaıfınaldyq qarsylastary Gızela Dýlko men Flavııa Pennetta dýeti atanyp otyr. Olar óz kezeginde shırek fınalda Irına Begý (Rýmynııa) jáne Anastasııa Rodıonova (Avstralııa) jubyn 6:1, 6:1 esebimen oısyratqan bolatyn.
Jartylaı fınalǵa shyqqan Shvedova men Kıng ózderine týrnırdiń 32 350 AQSh dollar syıaqysy men WTA reıtıngisinde 395 upaıyn qamtamasyz etti.
