Tennıs: Shtýtgart týrnırinde Zarına Dııastyń qarsylasy belgili boldy
ORAL. QazAqparat - Tennısten Shtýtgart týrnırinde qazaqstandyq Zarına Dııastyń qarsylasy belgili boldy, dep habarlaıdy QazAqparat tilshisi.
Osy týrnırdiń irikteý saıysynan sátti ótken Z.Dııas alǵashqy aınalymda latvııalyq tennısshi Anastasııa Sevastovamen kezdesýi kerek edi. Alaıda A.Sevastova bul týrnırge qatysýdan bas tartty. Jarysty uıymdastyrýshylar onyń ornyna germanııalyq tennısshi Karına Vıtteftini «lakı-lýzer» retinde qosty. K.Vıtteft Z.Dııas sııaqty irikteý saıysyna qatysyp, fınalda chehııalyq Marketa Vondroýshovadan jeńilip qalǵan bolatyn.
Osylaısha Z.Dııas pen K.Vıtteft bıyl ekinshi ret kezdeseıin dep otyr. Naýryz aıynda qazaqstandyq tennısshi Maıamı týrnırinde germanııalyq sportshyny 4:6, 7:5, 6:0 esebimen tize búktirgen edi. Qazirgi kezde Zarına álemdik reıtıngte 52-inshi orynda tursa, Karına odan tórt saty keıin keledi. Bul eki tennısshiniń qaı jeńgeni ekinshi aınalymda álemniń besinshi raketkasy, latvııalyq Elena Ostapenkomen kúsh synasady.
Aıta keteıik, Túrkııanyń Ystanbul qalasynda ótip jatqan týrnırde taǵy bir qazaqstandyq tennısshi ıÝlııa Pýtıntseva birinshi aınalymda álemniń 34-inshi raketkasy, rýmynııalyq Sorana Kyrstıamen sheberlik baıqasady. Al Býdapesht týrnırinde Aleksandr Býblık Ózbekstan eliniń ókili Denıs Istomınmen kortqa shyǵady.
Budan buryn Z.Dııastyń Shtýtgartta negizgi týrnırge joldama alyp, Mıhaıl Kýkýshkınniń Barselona jarysynyń alǵashqy aınalymynan asa almaǵanyn jazǵan bolatynbyz.
