Tennıs: Serena Ýılıams «Úlken dýlyǵa» týrnırinde 23-inshi ret chempıon atanyp, rekord jasady
ASTANA. QazAqparat - Búgin tennısten Avstralııa ashyq chempıonatynyń fınalynda apaly-sińlili Vınýs jáne Serena Ýılıamster ózara kezdesti, dep habarlaıdy «QazAqparat» HAA tilshisi.
«Eýrosport» telearnasynan tikeleı efırde kórsetkenindeı, oıyn birden tartysty bastaldy. Bastapqyda tennısshiler eki-ekiden breık jasap ta úlgerdi. Keı tusta ashýǵa erik bergen Serena tipti raketkasyn kortqa uryp, syndyryp tastap, tóreshiden eskertý aldy. Degenmen álemniń ekinshi raketkasy emes pe, onyń sheshýshi sátterde apasynan sheberligi basym ekendigi kózge uryp turdy. Birinshi partııa 6:4 esebimen Serenanyń paıdasyna aıaqtaldy.
Ekinshi partııada esep 3:3 bolǵannan keıin jetinshi geımde Vınýs dop bergen mezgilde Serena óz múmkindigin qalt jibermeı, breık jasap, alǵa shyqty. Sodan keıin ózi dop bergen sátte de apasyna des bermeı, esepti 5:3-ke jetkizdi. Budan keıin Vınýs óz geımin alyp, esepti qysqartqanymen, Serena báribir myqty ekendigin tanytty. Sóıtip bul joly da 6:4 esebimen utty.
Osylaısha, Serena Ýılms álem birinshiligimen teń sanalatyn «Úlken dýlyǵa» týrnırlerinde 23-inshi ret chempıon atanyp, bul kórsetkish boıynsha germanııalyq ataqty tennısshi Shteffı Grafty (22) basyp ozdy.
Aıta keteıik, buǵan deıin «Úlken dýlyǵa» týrnırleriniń fınalynda apaly-sińliler segiz ret kezdesip, sonyń altaýynda Serena jeńiske jetken edi. Sońǵy ret 2015 jyly US Open fınalynda da Serena utqan bolatyn. Bir qyzyǵy, olardyń kásibı deńgeıde alǵashqy ózara oıyny budan 19 jyl buryn osy Avstralııa ashyq chempıonatynda ótip, onda Vınýs ústemdik kórsetken eken. Jalpy, olar 28 ret sheberlik baıqasyp, sonyń 17-sinde Serena basym túsip otyr. Al osy birinshiliktiń 2003 jylǵy fınalynda apaly-sińliler kortqa shyǵyp, onda da kishisiniń baǵy janypty. Sińlisi «aıamaǵandyqtan», Vınýstyń búgin de joly bolmady. Bul, kim bilgen, jasy kelip qalǵan onyń sońǵy múmkindigi shyǵar. Degenmen Avstralııa ashyq chempıonatynda talaıdy jolda qaldyryp, tamasha oıyn órnegin kórsetken Vınýs dúısenbi kúni 11-inshi raketka atanatyn bolsa, al Serena álemdik reıtıngte qaıtadan kósh bastaıdy.
Bul chempıonattyń basty bir ereksheligi, áıelder arasynda da, erler arasynda da fınalǵa alǵash ret jasy otyzdan asqan tennısshiler shyqty. Vınýs 36-da bolsa, Serena odan bir jas qana kishi. Al erteń chempıondyq ataq úshin talasatyn shveıtsarııalyq Rodjer Federer 35-te bolsa, ıspanııalyq Rafael Nadal 30-da. Bul baby kelisse, sheberliktiń jasqa qaramaıtyndyǵyn kórsetedi.
