Tennıs: Rybakına Ystanbul týrnıriniń jartylaı fınalyna óte almady
NUR-SULTAN. QazAqparat - Qazaqstandyq tennısshi Elena Rybakına Ystanbul týrnıriniń jartylaı fınalyna óte almady, dep habarlaıdy QazAqparat tilshisi.
Dúnıejúzilik reıtıngte 161-orynda turǵan 19 jasar qazaqstandyq sportshy shırek fınalda álemniń 47-raketkasy, jýyrda 33-ke tolǵan chehııalyq Barbora Strytsovamen kúsh synasty.
Birinshi partııada Rybakına qarsylasyna birde-bir geım bermeı, oısyrata utty - 6:0.
Esesine ekinshi set tartysty órbip, taı-breıkke deıin jetti. Onda tájirıbeli tennısshiniń baǵy jandy - 8:6.
Úshinshi, sheshýshi partııada qos birdeı breık jasaǵan Strytsova 4:0 esebimen alǵa shyqty. Sodan keıin matchty taǵy bir breıkpen túıindedi - 6:0.
Báseke eki saǵatqa jýyq ýaqytqa sozyldy.
B.Strytsova jartylaı fınalda taǵy bir chehııalyq, álemniń 46-raketkasy, 19 jasar Marketa Vondrýsova nemese reıtıngte 117-oryndaǵy ıspanııalyq Lara Arrýabarrena-Vesınonyń bireýimen sheberlik baıqasady.
19 jasar Rybakınanyń irikteý saıystarynan ótip, týrnırdiń shırek fınalyna deıin jetkenin edáýir tabys dep esepteýge bolady. Alda osyndaı iri jarystarda sátti óner kórsetse, reıtıngisi de joǵarylaı beretini anyq.
Eske sala keteıik, budan buryn Elena Rybakınanyń Ystanbuldyń negizgi týrnırine joldama alyp, odan keıin ekinshi aınalymǵa ótip, shırek fınalǵa shyqqanyn jazǵan bolatynbyz.
Al erler arasynda Aleksandr Býblık Meksıkadaǵy týrnırdi sátti bastap, sosyn shırek fınalyna shyqty.
