Tennıs: Rybakına US Open irikteý týrnıriniń fınalyna shyqty
NUR-SULTAN. QazAqparat – Qazaqstandyq Elena Rybakına US Open týrnıri irikteý saıysynyń fınalyna shyqty, dep habarlaıdy QazAqparat tilshisi.
Dúnıejúzilik reıtıngte 67-orynda turǵan E.Rybakına irikteý saıystarynyń 1-raketkasy bolyp tirkelgen edi.
Qazaqstandyq tennısshi irikteý saıystarynyń jartylaı fınalynda reıtıngte 224-satydaǵy aýstralııalyq Arına Rodıonovamen kezdesti.
Nebári 53 mınýtqa sozylǵan matchta E.Rybakına qarsylasyn 6:2, 6:1 esebimen aıqyn basymdylyqpen utty.
E.Rybakına irikteý saıystarynyń fınalynda qos aýstralııalyq, álemniń 190-raketkasy Lızett Kabrera nemese reıtıngte odan alty satyǵa keıin turǵan Meddıson Inglıstiń bireýimen kortqa shyǵady. Ony utsa, 26 tamyzda bastalatyn US Open jarysyna joldama alady.
Eske sala keteıik, budan buryn E.Rybakınanyń US Open týrnıriniń irikteý saıysyn sátti bastaǵanyn jazǵan bolatynbyz.
