Tennıs: Rybakına Ýımbldon týrnırinde irikteý saıystarynyń fınalyna shyqty
NUR-SULTAN. QazAqparat - Qazaqstandyq Elena Rybakına Ýımbldon týrnırinde irikteý saıystarynyń fınalyna shyqty, dep habarlaıdy QazAqparat tilshisi.
Dúnıejúzilik reıtıngte 111-orynda turǵan qazaqstandyq tennısshi irikteý saıystarynyń jartylaı fınalynda álemniń 176-raketkasy, gollandııalyq Rıshel Hogenkamppen kúsh synasty.
Birinshi partııada breık jasaǵan R.Hogenkamp 2:0 esebimen alǵa shyqty. Degenmen E.Rybakına tarazy basyn teńestirip qana qoımaı, setti sátti aıaqtaı aldy - 6:3.
Ekinshi setti qazaqstandyq sportshy qos breıkpen bastady - 3:0. Sodan keıin de qarsylasyna des bergen joq - 6:0.
Báseke 45 mınýtqa sozyldy.
E.Rybakına irikteý saıystarynyń fınalynda álemniń 140-raketkasy, reseılik Varvara Flınkpen sheberlik baıqasady. Eger ony jeńse, 1 shilde kúni bastalatyn Ýımbldonnyń negizgi týrnırine joldama alady.
Eske sala keteıik, budan buryn E.Rybakınanyń Ýımbldon týrnıriniń irikteý saıysyn sátti bastaǵanyn jazǵan bolatynbyz.
