Tennıs: Rybakına Sankt-Peterbýrg týrnırin jeńispen bastady
NUR-SULTAN. QazAqparat – Qazaqstannyń birinshi, álemniń 25-raketkasy Elena Rybakına Sankt-Peterbýrg WTA týrnırin jeńispen bastady, dep habarlaıdy QazAqparat tilshisi.
Qazaqstandyq tennısshi alǵashqy aınalymda reıtıngte 59-orynda turǵan chehııalyq Katerına Sınıakovamen kezdesti.
Birinshi partııada E.Rybakına qos birdeı breıkpen alǵa shyqty – 4:0. Budan keıin qarsylasy breık jasaǵanymen, qazaqstandyq sportshy óz múmkindigin jibergen joq – 6:3.
Ekinshi sette Elena esep 3:4 bolǵan mezette Sınıakovanyń breık jasaýyna jol bergen joq. Sosyn ózi breıkpen alǵa ketti – 5:4. Aqyry matchqa dop bergende, qatelesken joq – 6:4.
Báseke 1 saǵat 18 mınýtqa sozyldy.
E.Rybakına shırek fınalǵa shyǵý úshin álemniń 41-raketkasy, latvııalyq Anastasııa Sevastova nemese 46-satydaǵy frantsııalyq Karolın Garsııanyń bireýimen talasady.
Taǵy bir qazaqstandyq, álemniń 34-raketkasy ıÝlııa Pýtıntseva osy jarysta bastapqy matchyn reıtıngge ózinen tórt saty tómen turǵan reseılik Veronıka Kýdermetovamen ótkizedi.
Júlde qory 848 myń AQSh dollaryna baǵalanǵan Sankt-Peterbýrg dodasy 16 aqpanda márege jetedi. Ótken jylǵy jarysta Nıderlandy ókili Kıkı Bertens fınalda horvatııalyq Donna Vekıchti utyp, jeńimpaz atanǵan bolatyn. Ol týrnırdiń ekinshi raketkasy retinde bıyl da qatysýda.
Eske sala keteıik, budan buryn A.Býblık pen M.Kýkýshkınniń Rotterdam týrnırinde oınaıtynyn jazǵan bolatynbyz.
A.Býblık alǵashqy aınalymda frantsııalyq Gregýar Barrermen sheberlik baıqasady. M.Kýkýshkın de G.Barrerdiń otandasy Jıl Sımonmen kortqa shyǵady.
