Tennıs: Rybakına «Rolan Garros» týrnıriniń tórtinshi aınalymyna shyqty
NUR-SULTAN. QazAqparat – Qazaqstannyń birinshi, álemniń 22-raketkasy Elena Rybakına «Rolan Garros» týrnıriniń tórtinshi aınalymyna shyqty, dep habarlaıdy QazAqparat tilshisi.
Frantsııa ashyq chempıonatynyń 21-raketkasy bolyp tirkelgen E.Rybakına úshinshi aınalymda reseılik Elena Vesnınamen kezdesti.
Qazaqstandyq tennısshi 6:1, 6:4 esebimen jeńiske jetti.
E.Rybakınanyń aıqyn basymdylyǵymen ótken báseke 1 saǵat 5 mınýtqa sozyldy.
Qazaqstandyq sportshy match barysynda 12 eıs jasap, 7 breık-poınttyń altaýyn paıdalana aldy. Qarsylasy bir eıs, bir breıkpen shekteldi.
E.Rybakına shırek fınalǵa shyǵý úshin amerıkalyqtar, kezinde dúnıejúzilik reıtıngte kósh bastaǵan, «Úlken dýlyǵa» týrnırleriniń 23 márte chempıony Serena Ýılıams nemese Danıel Kollınzdiń qaı jeńgenimen talasady.
Osylaısha E.Rybakına óz sporttyq jolynda alǵash ret «Úlken dýlyǵa» týrnıriniń tórtinshi aınalymyna ótip otyr.
Eske sala keteıik, budan buryn A.Býblık pen A.Golýbevtiń Rolan Garros týrnıriniń úshinshi aınalymyna shyqqanyn, Z.Dııastyń álemniń 15-raketkasyna jol bergenin jazǵan bolatynbyz.
