Tennıs: Rybakına Nanchan týrnıriniń fınalynda jeńilip qaldy
NUR-SULTAN. QazAqparat – Qazaqstandyq Elena Rybakına Qytaıdaǵy Nanchan WTA týrnıriniń fınalynda jeńilip qaldy, dep habarlaıdy QazAqparat tilshisi.
Álemniń 69-raketkasy E.Rybakına fınalda dúnıejúzilik reıtıngte 78-orynda turǵan shvetsııalyq Rebekka Petersonmen sheberlik baıqasty.
Bul qarsylastardyń ózara birinshi kezdesýi edi. Keshegi, úsh setke sozylǵan kezdesý áser etti me, Rybakına match barysynda sharshańqy kórinip, qatelikterge jıi jol berdi.
Birinshi partııada alǵashqy bolyp dop bergen qazaqstandyq tennısshi qarsylasynyń breık jasaýyna múmkindik berip qoıdy. Sodan keıin ekinshi ret breık jasaǵan Peterson kóp qınalmaı, jeńiske jetti – 6:2.
Ekinshi set te shvetsııalyq sportshynyń breık jasaýymen bastaldy. Sodan keıin qarsylasyna esh múmkindik bergen joq – 6:0.
Fınaldyq báseke bir saǵattan sál astam ýaqytqa sozyldy.
Osylaısha R.Peterson WTA jarystaryndaǵy alǵashqy jeńisine qol jetkizdi.
Eske sala keteıik, budan buryn Elena Rybakınanyń Nanchan dodasynyń fınalyna shyqqanyn, Andreı Golýbev pen Aleksandr Nedovesovtiń juptyq synda Ystanbul jarysynyń jeńimpazy atanǵanyn, al Zarına Dııastyń Osakada negizgi týrnırge joldama alǵanyn jazǵan bolatynbyz.
