Tennıs: Rybakına Dýbaıda Aýstralııa chempıonyn utty
NUR-SULTAN. QazAqparat - Qazaqstannyń birinshi, álemniń 19-raketkasy Elena Rybakına Dýbaı týrnıriniń ekinshi aınalymyna shyqty, dep habarlaıdy QazAqparat tilshisi.
E.Rybakına alǵashqy aınalymda álemniń jetinshi raketkasy, bıylǵy Aýstralııa ashyq chempıonatynyń jeńimpazy, amerıkalyq Sofııa Kenınmen kezdesti.
Birinshi partııada amerıkalyq sportshy taı-breıkte basym tústi - 7:6 (7:2).
Ekinshi partııada Elena ese qaıyrdy - 6:3.
Sheshýshi, úshinshi sette esep 4:3 bolǵan mezette Rybakına breık jasaı bildi. Sodan keıin ol matchqa dop bergende, qatelesken joq - 6:3.
Tartysty báseke eki saǵatqa sozyldy.
Osylaısha Aýstralııa chempıonyn utqan E.Rybakına júlde qory 3 mln AQSh dollaryna jýyqtaıtyn jarystyń shırek fınalyna shyǵý úshin álemniń 58-raketkasy, chehııalyq Katerına Sınıakovamen talasady. Elena jýyrda Sankt-Peterbýrg dodasynda K.Sınıakovany 6:3, 6:4 esebimen tize búktirgen bolatyn.
Eske sala keteıik, budan buryn A.Býblıktiń Marsel týrnırin jeńispen bastaǵanyn jazǵan bolatynbyz.
