Tennıs: Rybakına Doha premer týrnırin jeńispen bastady
NUR-SULTAN. QazAqparat – Qazaqstannyń birinshi, álemniń 17-raketkasy Elena Rybakına Doha (Katar) premer týrnırin de jeńispen bastady, dep habarlaıdy QazAqparat tilshisi.
E.Rybakına alǵashqy aınalymda álemniń 72-raketkasy, rýmynııalyq Sorana Kyrstıamen kezdesti.
Osy dodanyń 14-raketkasy bolyp tirkelgen qazaqstandyq sportshy 20 jasta bolsa, budan on jyl buryn úzdik 25 tennısshiniń qataryna kirgen tájirıbeli qarsylasy 29-da edi.
Ortalyq kortta ótken birinshi partııada rýmynııalyq sportshy breıkpen alǵa shyqty – 2:0. Degenmen qazaqstandyq tennısshi sol boıda tarazy basyn teńestirdi – 2:2. Áıtse de S.Kyrstıa qaıyra breıkke qol jetkizdi – 4:2. Sodan keıin setti taǵy bir breıkpen bitirdi – 6:3.
Ekinshi sette Rybakına breıkpen alǵa ketti – 3:1. Kyrstıa esepti teńestirgenimen, sosyn qazaqstandyq tennısshi qatarynan úsh geımdi aldy – 6:3.
Úshinshi, sheshýshi setti de Elena breıkpen bastady – 2:0. Taǵy bir breık – 5:1. Sodan keıin matchqa dop bergende, múmkindigin múlt jibergen joq – 6:1.
Tartysty báseke 1 saǵat 40 mınýtqa sozyldy.
Elena match barysynda 7 eıs jasasa, qarsylasy tek bireýmen shekteldi.
E.Rybakına ekinshi aınalymda álemniń 62-raketkasy, belgııalyq Elıson Van Eıtvankpen kortqa shyǵady. Ony utsa, álemniń 1-raketkasy, aýstralııalyq Eshlı Bartımen kezdesýi ábden yqtımal. Ótken aptada qazaqstandyq tennısshi álemniń ekinshi jáne úshinshi raketkalary Sımona Halep jáne Karolına Plıshkovamen betpe-bet kelgen edi.
Buǵan deıin E.Rybakına bıyl qatarynan tórt birdeı WTA jarysynyń fınalyna shyǵyp, sonyń bireýinde ǵana (Hobart) jeńiske jetken bolatyn. Al Doha dodasyna ol alǵash ret qatysyp otyr. Osy maýsymda tamasha óner kórsetip kele jatqan qazaqstandyq tennısshi WTA-nyń chempıondyq kestesinde besinshi orynda keledi.
Eske sala keteıik, budan buryn Elena Rybakınanyń álemdik reıtıngte rekordtyq 17-orynǵa kóterilgenin, al Mıhaıl Kýkýshkınniń Dýbaıda jeńilip qalǵanyn, ıÝlııa Pýtıntsevanyń Doha týrnıriniń ekinshi aınalymyna shyqqanyn jazǵan bolatynbyz.
