Tennıs: «Rolan Garros» týrnıri taǵy bir aptaǵa keıinge shegerildi
NUR-SULTAN. QazAqparat –Tennısten jyl saıyn Parıjde ótetin «Rolan Garros» týrnıri taǵy bir aptaǵa shegerildi, dep habarlaıdy QazAqparat tilshisi.
Ulttyq olımpıada komıteti málim etkenindeı, Frantsııa ashyq chempıonaty bıylǵy 27 qyrkúıek pen 11 qazan aralyǵynda ótetin boldy.
Uıymdastyrýshylar ATR jáne WTA-men keńeskennen keıin osyndaı sheshimge keldi. Bul tennısshilerdiń taǵy bir «Úlken dýlyǵa» dodasy – US Open týrnırinen keıin qalpyna kelýlerine múmkindik beredi.
Budan buryn jazǵanymyzdaı, «Rolan Garros» týrnıri kúzge qaldyrylyp, 20 qyrkúıek pen 4 qazan aralyǵynda ótetin bolǵan-dy. Olaı bolǵan jaǵdaıda bir apta buryn aıaqtalatyn US Open týrnırinen keıin sportshylardyń daıyndalýyna ýaqyt qalmaıtyn.
«Rolan Garros» – jyl saıyn ótetin tórt «Úlken dýlyǵa» týrnıriniń biri. Oǵan qazaqstandyq tennısshiler de únemi qatysyp, baq synap keledi.
