Tennıs: Rafael Nadal «Úlken dýlyǵa» týrnırin 21-ret utyp, rekord jasady
NUR-SULTAN. QazAqparat – Ispanııalyq Rafael Nadal erler arasynda Aýstralııa ashyq chempıonatynyń jeńimpazy atandy, dep habarlaıdy QazAqparat tilshisi.
Dúnıejúzilik reıtıngte 5-orynda turǵan R.Nadal fınalda álemniń 2-raketkasy, reseılik Danııl Medvedevpen bas júldeni sarapqa saldy.
Alǵashqy eki partııada reseılik tennısshi ábjildik tanytty – 6:2, 7:6 (7:5). Alaıda sodan keıin ıspanııalyq sportshy qatarynan úsh sette 6:4, 6:4, 7:5 esebimen basym túsip, jeńisti julyp aldy.
Asa tartysty ótken match 5 saǵat 24 mınýtqa sozyldy.
Osylaısha R.Nadal 21-ret «Úlken dýlyǵa» týrnıriniń chempıony atanyp, rekordtyq nátıjege qol jetkizdi.
Ótken jyly Aýstralııa ashyq chempıonatynyń fınalynda reseılik D.Medvedevti 7:5, 6:2, 6:2 esebimen utqan álemniń 1-raketkasy, serbııalyq Novak Djokovıch úzdik shyqqan edi.
Áıtse de bıyl ol vızaǵa baılanysty janjaldan keıin eline qaıtarylyp, dodaǵa qatysa almaǵan bolatyn.
Eske sala keteıik, budan buryn Anna Danılınanyń Aýstralııa ashyq chempıonatynyń fınalynda jeńilip qalǵanyn jazǵan bolatynbyz.
