Tennıs: Rafael Nadal Rolan Garros týrnıriniń onynshy márte jeńimpazy atandy
ASTANA. QazAqparat - Parıjde Rolan Garros týrnıriniń erler arasyndaǵy fınaldyq básekesinde álemniń úshinshi jáne tórtinshi raketkalary, shveıtsarııalyq Sten Vavrınka men ıspanııalyq Rafael Nadal kúsh synasty, dep habarlaıdy «QazAqparat» tilshisi.
«Eýrosport» telearnasynan tikeleı efırde kórsetkenindeı, kezdesý barysynda ıspanııalyq tennısshi tamasha oıyn órnegin kórsete bildi. Al jartylaı fınalda álemniń birinshi raketkasy, ulybrıtanııalyq Endı Marreıdi utqan Vavrınka kúshin soǵan kóbirek jumsap qoıdy ma, pálendeı qarsylyq tanyta alǵan joq. Tipti júıkesi syr berip, raketkasyn uryp syndyryp, tóreshiden eskertý alǵan sáti de boldy. Birinshi partııada eki márte breık jasaǵan Nadal 6:2 esebimen jeńiske jetti. Ekinshi partııada taǵy bir breıkke qol jetkizgen ıspanııalyq tennısshi 6:3 esebimen basym tústi. Úshinshi partııada da Vavrınkaǵa esh múmkindik bermegen Nadal úsh birdeı breık jasap, 6:1 esebimen tize búktirdi.
Osylaısha, otyz bir jastaǵy Rafael Nadal Rolan Garros týrnıriniń onynshy márte chempıony atanyp, óziniń tarıhı jeńisine qol jetkizdi. Ol osyǵan deıin «Úlken dýlyǵa» týrnırin 14 ret utsa, sonyń toǵyzy Frantsııa ashyq chempıonaty edi. Budan úsh jyl buryn osy Rolan Garros jarysynyń jeńimpazy atanǵan Nadaldyń sodan beri «Úlken dýlyǵa» týrnırinde joly bolmaı, oıyny qojyrap júrgen edi. Endi, mine, ol óziniń burynǵy joǵary deńgeıine qaıtyp oraldy deýge bolady.
Eske sala keteıik, Rolan Garros týrnırine Qazaqstannan qatysqan Mıhaıl Kýkýshkın ekinshi aınalymda taǵy bir ıspanııalyq Roberto Baýtısta-Agýttan utylyp, jarys jolynan shyǵyp qalǵan bolatyn.
