Tennıs: Pýtıntseva úzdik 40 tennısshiniń qataryna qaıta endi
NUR-SULTAN. QazAqparat - Qazaqstannyń birinshi raketkasy ıÝlııa Pýtıntseva úzdik 40 tennısshiniń qataryna qaıta endi, dep habarlaıdy QazAqparat tilshisi.
Búgin jańartylǵan WTA reıtıngisinde ıÝ.Pýtıntseva 43-ten 39-orynǵa kóterildi.
Zarına Dııas burynǵy 89-ornynda qalsa, taǵy bir qazaqstandyq Elena Rybakına 113-ten 111-ge joǵarylady.
Búgin sondaı-aq reıtıng kóshbasshysy ózgerdi. Keshe Bırmıngem (Ulybrıtanııa) týrnıriniń jeńimpazy atanǵan aýstralııalyq Eshlı Bartı japonııalyq Naomı Osakany basyp ozyp, 1-raketka atandy. Buǵan ıÝ.Pýtıntsevanyń tikeleı qatysy bar. Sol Bırmıngem týrnırinde ıÝlııa N.Osakany joldan taıdyryp, bul onyń óz upaılaryn joǵaltyp, kóshbasshylyq ornynan aıyrylýyna ákep soqtyrdy. Oǵan qosa ıÝ.Pýtıntseva Qazaqstan tarıhynda alǵash ret álemniń 1-raketkasyn utty.
Qazaqstandyq tennısshilerdiń aldaǵy týrnırlerde óz kórsetkishterin jaqsartýlaryna tolyq múmkindikteri bar.
Búgin ıÝ.Pýtıntseva júlde qory 1 mln AQSh dollaryna jýyqtaıtyn Istbýrn (Ulybrıtanııa) týrnıriniń alǵashqy aınalymynda amerıkalyq Danıel Kollınzben sheberlik baıqasady.
Osy aptada sondaı-aq «Úlken dýlyǵa» týrnıriniń biri - Ýımbldon jarysynyń irikteý saıystary bastalady. Onda negizgi dodaǵa ıÝ.Pýtıntseva men Z.Dııas birden joldama aldy.
Erler arasynda Ýımbldonǵa qatysýshylar tizimine Qazaqstannan Mıhaıl Kýkýshkın men Aleksandr Býblık engizilgen. Al irikteý saıysynda taǵy bir qazaqstandyq Aleksandr Nedovesov baq synap kóredi. Ol búgin ıtalııalyq Djanlýka Magermen kortqa shyǵady.
Eske sala keteıik, budan buryn qazaqstandyq tennısshilerdiń Istbýrn týrnırindegi qarsylastary belgili bolǵanyn jazǵan bolatynbyz.
