Tennıs: Pýtıntseva Charlston týrnıriniń jartylaı fınalyna shyǵa almady
NUR-SULTAN. QazAqparat – Qazaqstandyq, álemniń 31-raketkasy ıÝlııa Pýtıntseva Charlston (AQSh) WTA 500 týrnıriniń jartylaı fınalyna shyǵa almady, dep habarlaıdy QazAqparat tilshisi.
Osy dodanyń 11-raketkasy bolyp tirkelgen ıÝ.Pýtıntseva shırek fınalda dúnıejúzilik reıtıngte 91-orynda turǵan chernogorııalyq Danka Kovınıchpen kúsh synasty.
Reıtıngisi tómen bolǵanymen, chernogorııalyq tennısshi ońaı shaǵylatyn jańǵaq emes, tájirıbesi de barshylyq. Ol úshinshi aınalymda álemniń 11-raketkasy, chehııalyq Petra Kvıtovany 6:4, 6:1 esebimen jeńip ketken bolatyn.
Qarsylastar osyǵan deıin ózara eki márte kezdesse, sonyń ekeýinde de qazaqstandyq tennısshi jeńiske jetken eken.
Birinshi partııada aldymen chernogorııalyq sportshy breıkpen alǵa shyqqanymen, ıÝ.Pýtıntseva tarazy basyn teńestirdi. Sodan soń D.Kovınıch taǵy alǵa ketti – 4:2. Degenmen ıÝlııa breık jasap, esepti qaıta teńestirdi – 4:4. Taı-breıkte Pýtıntseva jaqsy oınady – 7:6 (7:2).
Ekinshi sette esep 3:3 bolǵan mezette qarsylasynyń qateligin paıdalanǵan D.Kovınıch breık jasaı aldy. ıÝ.Pýtıntseva tarazy basyn teńestirgenimen, Kovınıch taǵy bir breıkke qol jetkizdi. Sosyn setke dop bergende, múmkindigin múlt jibergen joq – 7:5.
Úshinshi, sheshýshi sette chernogorııalyq tennısshi 4:0 esebimen alǵa ketti. Aqyry matchty taǵy bir breıkpen túıindedi – 6:1.
Tartysty báseke 2 saǵat 52 mınýtqa sozyldy.
D.Kovınıch júlde qory 565 myń AQSh dollarynan asatyn jarystyń fınalyna shyǵý úshin álemniń 28-raketkasy, Týnıs ókili Ons Jaber nemese reıtıngte 36-satydaǵy amerıkalyq Korı Gaýftyń bireýimen talasady.
Eske sala keteıik, budan buryn A.Nedovesov pen A.Golýbevtiń Horvatııadaǵy týrnırdiń fınalyna shyqqanyn jazǵan bolatynbyz.
