Tennıs: Popko men Nedovesov Shymkent týrnıriniń jartylaı fınalynda kezdesedi
Dúnıejúzilik reıtıngte 606-orynda turǵan qazaqstandyq tennısshi shırek fınalda álemniń 522-raketkasy, ózbekstandyq Sanjar Faızıevpen kezdesti. Birinshi partııada D.Popko 6:4 esebimen qarsylasynan basym tússe, ekinshisinde birde-bir geım ustatqan joq. Match 1 saǵat 11 mınýtqa sozyldy.
Taǵy bir qazaqstandyq, reıtıngte 209-satydaǵy Aleksandr Nedovesov shırek fınalda osy týrnırdiń ekinshi, álemniń 162-raketkasy, ulybrıtanııalyq Djeı Klarkpen kúsh synasty. Birinshi partııany qarqyndy bastaǵan D.Klark 3:0 esebimen alǵa ketti. Ol sol basymdyǵynan aıyrylǵan joq - 6:2. Ekinshi sette A.Nedovesov esep 1:1 bolǵan mezette breık jasaı aldy - 2:1. Alaıda ulybrıtanııalyq sportshy tarazy basyn teńestire bildi. Tartysty órbigen on birinshi geımde qazaqstandyq tennısshi breıkke qol jetkizdi - 6:5. Aqyry ol ózi dop bergende, múmkindigin jibergen joq - 7:5. Úshinshi, sheshýshi partııany otandasymyz breıkpen bastap, óz geımin aldy - 2:0. Taǵy bir breık - 3:0. A.Nedovesov matchty aıqyn basymdylyqpen aıaqtaı bildi - 6:1.
Tartysty oıyn eki saǵattan astam ýaqytqa sozyldy.
Osylaısha D.Popko men A.Nedovesov jartylaı fınalda ózara kezdesip, sońǵy básekege beriletin joldamany sarapqa salady. Bul - fınalda bir qazaqstandyq tennısshi oınaıdy degen sóz.
Shymkent týrnırinde juptyq synda jartylaı fınalǵa shyqqandar arasynda da qazaqstandyqtar bar. Jarystyń ekinshi raketkasy bolyp tirkelgen qazaqstandyq Tımýr Habıbýllın men ýkraınalyq Vladıslav Manafov aýstrııalyq ıÝrıı Rodıonov pen fın Emıl Rýýsývýorımen fınaldyń joldamasy úshin synǵa túsedi.
Sondaı-aq, taǵy bir qazaqstandyq Denıs Evseev pen úndistandyq Ardjýn Kadhe jartylaı fınalda týrnırdiń 1-raketkalary, portýgalııalyq Gonsalý Olıveıra men Belarýs eliniń ókili Andreı Vasılevskıımen sheberlik baıqasady. Júlde qory 54 160 AQSh dollaryn quraıtyn Shymkent týrnıri 12 mamyrda márege jetedi.
Eske sala keteıik, budan buryn Galına Voskoboeva juptyq synda Madrıd týrnıriniń, al Zarına Dııas Japonııadaǵy jarystyń jartylaı fınalyna shyqqan bolatyn. Dmıtrıı Popko men Aleksandr Nedovesov Shymkent týrnıriniń shırek fınalyna joldama alǵan edi.