Tennıs: Popko Aýstralııa ashyq chempıonatynyń irikteý saıysyn sátti bastady
NUR-SULTAN. QazAqparat – Qazaqstandyq Dmıtrıı Popko Aýstralııa ashyq chempıonatynyń irikteý saıysyn sátti bastady, dep habarlaıdy QazAqparat tilshisi.
Dúnıejúzilik reıtıngte 184-orynda turǵan D.Popko alǵashqy kezdesýin álemniń 137-raketkasy, qytaılyq Chjıchjen Chjanmen ótkizdi.
Match tartysty ótip, eki partııa da taı-breıkke deıin jetti. Qazaqstandyq sportshy irikteý saıystarynyń 25-raketkasy bolyp tirkelgen qarsylasyn 7:6 (9:7), 7:6 (7:5) esebimen tize búktirdi.
Báseke eki saǵatqa jýyq ýaqytqa sozyldy.
D.Popko irikteý saıystarynyń jartylaı fınalynda reıtıngte 197-satydaǵy frantsııalyq Entso Kokomen sheberlik baıqasady.
«Úlken dýlyǵa» týrnıriniń biri – Aýstralııa ashyq chempıonaty 20 qańtar – 2 aqpan aralyǵynda ótedi. Іrikteý saıysy osy aptanyń aıaǵynda márege jetip, negizgi týrnırge joldama alǵandar anyqtalady.
Eske sala keteıik, budan buryn Elena Rybakınanyń Hobart týrnıriniń shırek fınalyna shyqqanyn jazǵan bolatynbyz.
