Tennıs: Novak Djokovıch segizinshi márte Aýstralııa chempıony atandy

Fınalda álemniń 2-raketkasy Novak Djokovıch pen reıtıngte 5-orynda turǵan aýstrııalyq Domınık Tım bas júldeni sarapqa saldy.

Buǵan deıin qarsylastardyń on ret joldary toqaılassa, sonyń altaýynda 32 jastaǵy serbııalyq tennısshiniń mereıi ústem boldy.

N.Djokovıch 16 márte «Úlken dýlyǵa» týrnıriniń jeńimpazy atansa, sonyń jeteýi Aýstralııa ashyq chempıonaty eken. Onyń ústine Novak Aýstralııa birinshiliginde fınaldyq matchta jeńilip kórmegen.

Al 26 jastaǵy D.Tım buǵan deıin 2018 jáne 2019 jyldary Frantsııa ashyq chempıonatynyń fınalyna shyqqanymen, ekeýinde de utylyp qalǵan bolatyn.

Birinshi partııada serbııalyq sportshy 3:0, 4:1 esebimen alǵa shyqty. Qarsylasy tarazy basyn teńestirgenimen, N.Djokovıch bul setti bermedi – 6:4.

Esesine ekinshi jáne úshinshi sette D.Tım kúsh alyp ketti – 6:4, 6:2.

Degenmen tórtinshi partııada N.Djokovıch breık jasap, sol basymdylyǵyn paıdalana bildi – 6:3.

Besinshi, sheshýshi partııada esep 1:1 bolǵan mezette serbııalyq tennısshi breık jasaı aldy – 2:1. Budan keıin D.Tım qarymta qaıtaratyndaı múmkindigin múlt jiberdi. Aqyry esep 5:4 bolyp, N.Djokovıch matchqa dop bergende, qatelesken joq – 6:4.

Naǵyz fınalǵa tán, tartysty ótken báseke tórt saǵatqa sozyldy.

Osylaısha N.Djokovıch Aýstralııa chempıonatynda segizinshi márte top jardy. Ol ótken jyly da úzdik shyqqan bolatyn. Sóıtip serbııalyq sportshy dúnıejúzilik reıtıngte qaıtadan birinshi raketka atanady.

Aýstralııa birinshiliginde erler arasynda jekeleı synda qazaqstandyqtar Aleksandr Býblık pen Mıhaıl Kýkýshkın alǵashqy aınalymnan asa almady. Esesine olar juptyq synda tabysty óner kórsetip, el tennısi tarıhynda tuńǵysh ret «Úlken dýlyǵa» týrnırinde jartylaı fınalǵa deıin jetti.

Eske sala keteıik, budan buryn áıelder arasynda Aýstralııa chempıonatynyń jeńimpazy anyqtalǵanyn, qazaqstandyqtardy utqan juptyń chempıon atanǵanyn jazǵan bolatynbyz.