Tennıs: Mıhaıl Kýkýshkın Monte-Karlo týrnırin sátti bastady
NUR-SULTAN. QazAqparat - Qazaqstandyq tennısshi Mıhaıl Kýkýshkın Monte-Karlo (Monako) týrnıriniń alǵashqy aınalymynda frantsııalyq Jeremı Shardımen kezdesti, dep habarlaıdy QazAqparat tilshisi.
Qazaqstandyq sportshy búgin jańartylǵan dúnıejúzilik reıtıngte 44-ten 42-ge, al qarsylasy 42-den 41-satyǵa kóterilgen edi.
Olardyń ekeýi de 1987 jyly dúnıege kelgen tájirıbeli tennısshiler bolatyn.
Birinshi partııada breık jasaǵan Mıhaıl Kýkýshkın 4:3 esebimen alǵa shyqty. Sosyn muny taǵy bir breıkpen túıindedi - 6:3.
Ekinshi sette esep 5:4 bolǵan mezette qazaqstandyq sportshy breık jasap, matchty aıaqtaı bildi - 6:4.
Báseke 1 saǵat 23 mınýtqa sozyldy.
M.Kýkýshkın ekinshi aınalymda álemniń 8-raketkasy, grekııalyq Stefanos Tsıtsıpaspen kúsh synasady.
Júlde qory 5,5 mln eýrodan asatyn Monte-Karlodaǵy masters týrnıri 21 sáýirde márege jetedi.
Eske sala keteıik, budan buryn M.Kýkýshkınniń Monte-Karlodaǵy qarsylasy anyqtalǵanyn, taǵy bir qazaqstandyq Dmıtrıı Popkonyń AQSh-taǵy týrnırdiń jeńimpazy atanǵanyn jazǵan bolatynbyz. Al áıelder arasynda qazaqstandyq Galına Voskoboeva reseılik Veronıka Kýdermetovamen Lýgano týrnıriniń fınalynda ǵana ese jiberdi.
