Tennıs: Mıhaıl Kýkýshkın Maıamı týrnıriniń irikteý saıysyn sátti bastady
NUR-SULTAN. QazAqparat – Qazaqstandyq, álemniń 159-raketkasy Mıhaıl Kýkýshkın Maıamı masters týrnıriniń irikteý saıysyn sátti bastady, dep habarlaıdy QazAqparat tilshisi.
M.Kýkýshkın irikteý saıystarynyń jartylaı fınalynda álemniń 117-raketkasy, moldovalyq Radý Albotpen kezdesti.
Qazaqstandyq tennısshi eki saǵat jarymǵa jýyq ýaqytqa sozylǵan matchta 4:6, 7:6 (9:7), 6:2 esebimen jeńiske jetti.
Tartysty báseke barysynda M.Kýkýshkın 5 eıs jasap, 5 breık-poınttyń úsheýin paıdalandy. Qarsylasy 7 eıs, 2 breıkpen (7 breık-poınt) kózge tústi.
M.Kýkýshkın irikteý saıystarynyń fınalynda álemniń 88-raketkasy, danııalyq Holger Rýne nemese álemdik reıtıngide 372-oryndaǵy japonııalyq Shıntaro Mochızýkıdiń bireýimen sheberlik baıqasady. Kelesi qarsylasyn utsa, qazaqstandyq tennısshi 23 naýryz – 3 sáýir aralyǵynda ótetin negizgi týrnırge joldama alady.
Taǵy bir qazaqstandyq Dmıtrıı Popko irikteý saıystarynyń jartylaı fınalynda brazılııalyq Tıago Monteıromen kortqa shyǵady.
Eske sala keteıik, budan buryn Andreı Golýbevtiń Indıan-Ýells masters týrnıriniń fınalyna shyǵa almaǵanyn, qazaqstandyq tennısshilerdiń álemdik reıtıngide joǵary kóterilgenin jazǵan bolatynbyz.
