Tennıs: Mıhaıl Kýkýshkın Maıamı týrnırin jeńispen bastady
NUR-SULTAN. QazAqparat - Qazaqstandyq Mıhaıl Kýkýshkın Maıamı ATP 1000 týrnıriniń ekinshi aınalymyna shyqty, dep habarlaıdy QazAqparat tilshisi.
Álemniń 105-raketkasy M.Kýkýshkın bastapqy kezdesýin dúnıejúzilik reıtıngte 316-orynda turǵan ulybrıtanııalyq Djek Dreıpermen ótkizdi.
Tartysty ótken birinshi partııada qazaqstandyq tennısshi tarazy basyn ózine aýdara bildi - 7:5.
Budan keıin ulybrıtanııalyq sportshy 1 saǵat 15 mınýtqa sozylǵan básekeni jalǵastyrýdan bas tartty.
M.Kýkýshkın jalpy júlde qory 3,64 mln AQSh dollaryna baǵalanǵan jarystyń ekinshi aınalymynda álemniń 27-raketkasy, reseılik Aslan Karatsevpen kúsh synasady. A.Karatsevtiń bıylǵy qarqyny óte kúshti. Aýstralııa ashyq chempıonatynyń jartylaı fınalyna deıin jetken ol jýyrda Dýbaı týrnıriniń jeńimpazy atandy. Sonyń nátıjesinde reıtıngte 27-orynǵa kóterildi.
Eske sala keteıik, budan buryn qazaqstandyq juptyń Horvatııadaǵy týrnırdiń jartylaı fınalyna shyqqanyn, Zarına Dııastyń Maıamı jarysynyń úshinshi aınalymyna óte almaǵanyn jazǵan bolatynbyz.
