Tennıs: Mıhaıl Kýkýshkın Madrıdtiń negizgi týrnırine joldama aldy
ASTANA. QazAqparat - Qazaqstannyń birinshi, álemniń 96-ynshy raketkasy Mıhaıl Kýkýshkın Madrıdtiń negizgi týrnırine joldama aldy, dep habarlaıdy QazAqparat tilshisi.
Týrnırdi irikteý saıystarynan bastaǵan qazaqstandyq tennısshi áýeli dúnıejúzilik reıtıngte 107-inshi orynda turǵan frantsııalyq Nıkolıa Maıýdy 6:3, 6:4 esebimen tize búktirdi.
Búgin irikteý saıysynyń fınalynda M.Kýkýshkın álemniń 71-inshi raketkasy, serbııalyq Vıktor Troıtskımen kúsh synasty. Asa tartysty ótken básekeniń birinshi partııasynda qazaqstandyq tennısshi taı-breıkti 7:6 (7:5) sátti ótkizdi.
Ekinshi partııada M.Kýkýshkın qarsylasyn bet qaratpaı, 6:1 esebimen utty. Osylaısha ol negizgi týrnırge joldama aldy.
Júlde qory 7,4 mln AQSh dollarynan asatyn Madrıd týrnırindegi M.Kýkýshkınniń kelesi qarsylasy keıin anyqtalady. Bul jarys 13 mamyr kúni márege jetedi.
Eske sala keteıik, áıelder arasyndaǵy Madrıd týrnırinde qazaqstandyq Zarına Dııastyń alǵashqy aınalymda Pýerto-Rıko eliniń ókili Monıka Pýıgke ese jibergenin budan buryn jazǵan bolatynbyz.
