Tennıs: M.Kýkýshkın M.Chılıchten jeńilip qalǵanymen, jaqsy óner kórsetti
ORAL. QazAqparat - Tennısten Kreml kýbogy úshin halyqaralyq jarystyń jartylaı fınalynda qazaqstandyq Mıhaıl Kýkýshkın horvatııalyq, osy týrnırdiń ekinshi raketkasy, bıylǵy AQSh ashyq chempıonatynyń jeńimpazy Marın Chılıchpen taıtalasa bildi.
Buǵan deıin qarsylastar bir-aq ret kezdesip, onda qazaqstandyq tennısshi jeńiske jetken eken. Kreml kýbogynyń jartylaı fınalyna úsh márte shyqqan ári ótken jylǵy týrnırdiń fınalısi M.Kýkýshkın birinshi partııada dop bergen kezde M.Chılıchtiń qatty qarsylyǵyna tap boldy. Alaıda horvatııalyq tennısshi segiz breık-poınttyń bireýin de paıdalana almady. Esesine toǵyzynshy geımde M.Kýkýshkın jalǵyz breık-poıntty óz esebine jazdy. Odan keıin ózi dop bergen kezde de múmkindigin qalt jibergen joq. Sóıtip birinshi partııany 6:4 esebimen utty. Ekinshi set te Mıhaıldyń breık jasaýymen bastaldy. Alaıda odan keıin ózi dop bergen kezde osy basymdylyǵyn saqtaı almady. Partııa barysynda M.Chılıch taǵy bir breıkke qol jetkizip, 6:3 esebimen jeńdi. Sheshýshi, úshinshi partııada da eki márte breık jasaǵan horvatııalyq tennısshi 6:2 esebimen basym tústi.
Jalpy, M.Kýkýshkın M.Chılıchpen terezesi teń óner kórsetti. Onyń jeńilip qalýyna basty sebeptiń biri M.Chılıchtiń bergen doptary qatty, jyldamdyǵy da joǵary boldy. Sondyqtan ol eısti de kóp jasady. Onyń ústine juma kúni de M.ıÝjnyımen úsh partııa ótkizgen M.Kýkýshkınniń sheshýshi tustarda sharshaǵany sezilgendeı boldy.
Eń bastysy, jartylaı fınalǵa deıin jetken qazaqstandyq tennısshi upaı qoryn molaıtty. Osyǵan deıin álemdik reıtıngte 74-orynda tursa, aldaǵy dúısenbide joǵary kóterileri anyq.
