TENNIS: M.Kýkýshkın Kreml kýbogynyń ekinshi aınalymyna shyqty
ASTANA. QazAqparat - Qazaqstandyq Mıhaıl Kýkýshkın Kreml kýbogy úshin tennısten halyqaralyq týrnırdiń alǵashqy aınalymynda reseılik Andreı Rýblevpen kúsh synasty.
Dál 20 qazanda 18 jasqa tolǵan A.Rýblev óziniń týǵan kúnine syı jasaǵysy kelgenmen, odan on jasqa úlken, tájirıbesi de, sheberligi de mol, osy týrnırdiń segizinshi raketkasy M.Kýkýshkın buǵan múmkindik bergen joq. Birinshi partııa 6:2 esebimen aıaqtalsa, ekinshisinde A.Rýblev barynsha qarsylasyp baqty. Esep 4:4 bolyp turǵan mezette sheber oınaǵan M.Kýkýshkın breık jasaı bildi. Sodan keıin ózi dop bergende, birinshi matchboldan-aq aıaqtaı bildi. Sóıtip ekinshi partııa da 6:4 esebimen Mıhaıldyń paıdasyna sheshildi.
Ekinshi aınalymda M.Kýkýshkın taǵy bir reseılik Andreı Kýznetsovpen kortqa shyǵady.
Aıta keteıik, Kreml kýbogynyń júlde qory 698 325 AQSh dollaryn quraıdy. 2013 jyly M.Kýkýshkın osy jarystyń fınalyna deıin jetken bolatyn.
