Tennıs: Kýkýshkınniń Monte-Karlo týrnırindegi qarsylasy anyqtaldy
NUR-SULTAN. QazAqparat - Qazaqstannyń birinshi, álemniń 44-raketkasy Mıhaıl Kýkýshkınniń Monte-Karlo (Monako) týrnırindegi qarsylasy belgili boldy, dep habarlaıdy QazAqparat tilshisi.
Júlde qory 5,2 mln eýrodan asatyn masters týrnıriniń alǵashqy aınalymynda qazaqstandyq tennısshi dúnıejúzilik reıtıngte ózinen eki saty joǵary turǵan frantsııalyq Jeremı Shardımen sheberlik baıqasady.
Eger ony jeńgen jaǵdaıda álemniń 8-raketkasy, grekııalyq Stefanos Tsıtsıpaspen kortqa shyǵady. 14-21 sáýir aralyǵynda ótetin aıtýly dodaǵa álemniń 1-inshi jáne 2-raketkalary, serbııalyq Novak Djokovıch, Monte-Karlo týrnıriniń ótken jylǵy jeńimpazy, ıspanııalyq Rafael Nadal bastaǵan mańdaıaldy tennısshiler qatysady.
Búgin týrnırdiń irikteý saıystary ótedi.
Eske sala keteıik, budan buryn qazaqstandyq Galına Voskoboevanyń reseılik Veronıka Kýdermetovamen birge juptyq synda Lýgano týrnıriniń jartylaı fınalyna shyqqanyn jazǵan bolatynbyz.
