Tennıs: Kýkýshkın juptyq synda «Rolan Garros» týrnıriniń úshinshi aınalymyna shyqty
NUR-SULTAN. QazAqparat - Qazaqstandyq Mıhaıl Kýkýshkın belgııalyq Ioran Flıgenmen birge juptyq synda «Rolan Garros» týrnıriniń úshinshi aınalymyna shyqty, dep habarlaıdy QazAqparat tilshisi.
Qazaqstandyq-belgııalyq jup ekinshi aınalymda ýrýgvaılyq Pablo Kýevas pen ıspanııalyq Felısıano Lopespen kezdesti. Birinshi partııada Kýkýshkın men Flıgen 6:3 esebimen basymdylyq tanytsa, ekinshisinde qarsylastary dál sondaı eseppen ese qaıyrdy - 6:3. Úshinshi, sheshýshi partııada aldymen ýrýgvaılyq-ıspanııalyq jup breık jasaǵanymen, sodan keıin Kýkýshkın men Flıgen oıyn tizginin óz qoldaryna ala bildi - 6:4.
Tartysty match 1 saǵat 49 mınýtqa sozyldy.
Kýkýshkın men Flıgen shırek fınalǵa shyǵý úshin serbııalyq Mıomır Ketsmanovıch pen norvegııalyq Kasper Rýýd nemese argentınalyqtar Federıko Delbonıs pen Gılermo Dıýran juptarynyń qaı jeńgenimen talasady. Osylaısha Frantsııa ashyq chempıonatynda Qazaqstannan M.Kýkýshkın ǵana juptyq synda jarys jolyn jalǵastyrýda.
Keshe qazaqstandyq Galına Voskoboeva reseılik Veronıka Kýdermetovamen birge aýstralııalyq Samanta Stosýr men qytaılyq Chjan Shýaıdan jeńilip qaldy.
Eske sala keteıik, budan buryn Kýkýshkın juptyq synda «Rolan Garros» týrnırin sátti bastap, Zarına Dııas jeńilip qalǵan bolatyn.
