Tennıs: Kýkýshkın US Open týrnıriniń tórtinshi aınalymyna shyǵa almady
ASTANA. QazAqparat - Qazaqstannyń birinshi, álemniń 84-inshi raketkasy Mıhaıl Kýkýshkın US Open týrnıriniń úshinshi aınalymynda avstralııalyq Djon Mıllmanmen kúsh synasty, dep habarlaıdy QazAqparat tilshisi.
Dúnıejúzilik reıtıngte 55-inshi satyda turǵan D.Mıllman matchty sátti bastady.
Avstralııalyq tennısshi birinshi partııany 6:4 esebimen utty.
Ekinshi sette M.Kýkýshkın breık jasap, 2:1 esebimen alǵa shyqty. Partııanyń aıaǵyna deıin sol basymdylyǵynan aıyrylmaı, qarymta qaıtara bildi - 6:4.
Qazaqstandyq tennısshi úshinshi partııany breıkpen bastaǵanymen, sodan keıin ózi dop bergendegi geım asa tartysty órbidi. D.Mıllman besinshi breık-poıntyn sátti paıdalanyp, tarazy basyn teńestirdi - 1:1. Budan soń avstralııalyq sportshy bes birdeı geımdi alyp, esepti birjola 6:1-ge jetkizdi.
Tórtinshi partııada esep 2:2 bolǵan mezette M.Kýkýshkın jıi qatelesip, qarsylasynyń breık jasaýyna múmkindik berip qoıdy. Degenmen ózi qaıyra breık jasap, esepti teńestirdi - 3:3. Budan keıin Mıllman oıyn tizginin óz qolyna aldy - 4:3. Aqyry avstralııalyq tennısshi óz degenine jetti - 6:3.
Tartysty báseke úsh saǵatqa jýyq ýaqytqa sozyldy.
D.Mıllman shırek fınalǵa shyǵý úshin álemniń 2-inshi raketkasy, ataqty shveıtsarııalyq Rodjer Federer nemese otandasy, reıtıngte 30-ynshy oryndaǵy Nık Kırospen kortqa shyǵady.
M.Kýkýshkın ótken jylǵy US Open týrnırinde de úshinshi aınalymǵa deıin jetken bolatyn. Bıyl da sol jetistigin qaıtalady.
Eske sala keteıik, amerıkalyq Noı Rýbınnen aılasyn asyryp, US Open týrnırin jeńispen bastaǵan Mıhaıl Kýkýshkın ekinshi aınalymda álemniń 23-inshi raketkasy, ońtústikkoreıalyq Chhýn Hendi 7:6, 6:2, 6:3 esebimen utqan bolatyn.
