Tennıs: Kýkýshkın US Open týrnıriniń ekinshi aınalymyna shyqty
ASTANA. QazAqparat - Qazaqstandyq tennısshi Mıhaıl Kýkýshkın AQSh-tyń ashyq chempıonatyn sátti bastady, dep habarlaıdy «QazAqparat» tilshisi.
Dúnıejúzilik reıtıngte 103-inshi orynda turǵan, osy birinshilikke irikteý týrnıri arqyly ótken M.Kýkýshkın álemniń 25-inshi, atalmysh jarystyń 21-inshi raketkasy, ıspanııalyq Davıd Ferrermen kortqa shyqty. Mıhaıl birinshi partııada 4:6 esebimen jeńilgenimen, sodan keıin tamasha oınap, 6:3, 6:2, 6:1 esebimen ataqty tennısshini bet qaratpaı jeńdi. Ol buǵan deıin D.Ferrerdi birde-bir ret utyp kórmegen eken.
Ekinshi aınalymda M.Kýkýshkın óziniń burynǵy otandasy, álemdik reıtıngte 99-satyda kele jatqan reseılik Evgenıı Donskoımen kúsh synasady.
Myscore.ru saıtynan alynǵan málimetke qaraǵanda, áıelder arasyndaǵy básekede Qazaqstannyń birinshi, álemniń 50-inshi raketkasy ıÝlııa Pýtıntseva alǵashqy aınalymda taǵy bir reseılik, dúnıejúzilik reıtıngte 147-inshi orynda turǵan 1999 jylǵy Sofıa Jýkpen kezdesedi. Sofıa irikteý saıystaryn sátti ótkizip, negizgi týrnırge joldama alǵan bolatyn. Bul - onyń eresekter arasyndaǵy alǵashqy «Úlken dýlyǵa» týrnıri.
