Tennıs: Kýkýshkın US Open týrnıriniń ekinshi aınalymyna shyǵa almady
NUR-SULTAN. QazAqparat – Qazaqstandyq Mıhaıl Kýkýshkın US Open týrnıriniń ekinshi aınalymyna shyǵa almady, dep habarlaıdy QazAqparat tilshisi.
Dúnıejúzilik reıtıngte 129-orynda turǵan M.Kýkýshkın alǵashqy aınalymda álemniń 74-raketkasy, ıspanııalyq Pablo Andýharmen kúsh synasty.
Matchty qarqyndy bastaǵan qazaqstandyq tennısshi bastapqy eki setti óz esebine jazdy – 6:3, 6:4.
Sodan keıin ıspanııalyq sportshy tarazy basyn ózine burdy – 6:4.
Tórtinshi partııada esep 2:2 bolǵan kezde Kýkýshkın breık jasaǵanymen, Andýhar sol boıda tarazy basyn teńestirdi. Sosyn setti breıkpen bitirdi – 6:4.
Besinshi, sheshýshi sette ıspanııalyq tennısshi 4:1 esebimen alǵa ketti. Aqyry básekeni taǵy bir breıkpen támamdady – 6:2.
Asa tartysty ótip, 4 saǵat 15 mınýtqa sozylǵan matchta Kýkýshkın 12 eıs jasap, 18 breık-poınttyń tek tórteýin ǵana paıdalandy. Qarsylasy 10 eıspen qatar 6 breıkke (12 breık-poınt) qol jetkizdi.
P.Andýhar ekinshi aınalymda álemniń 115-raketkasy, germanııalyq Fılıpp Kolshraıbermen kezdesedi. Ol birinshi aınalymda álemniń 36-raketkasy, US Open týrnıriniń 2014 jylǵy jeńimpazy, horvatııalyq Marın Chılıchpen kortqa shyqty. Esep 6:7 (4:7), 6:7 (3:7), 6:2, 6:1, 2:0 bolyp, sońǵy partııada Kolshraıber alǵa ketken mezette horvatııalyq sportshy básekeni jalǵastyrýdan bas tartty.
Eske sala keteıik, budan buryn Nıý-Iorkta US Open týrnıri bastalatynyn, ıÝlııa Pýtıntsevanyń jeńilip qalǵanyn jazǵan bolatynbyz.
Elena Rybakına US Open týrnırin jeńispen bastady.
