Tennıs: Kýkýshkın tartysty matchta utylyp qaldy
ASTANA. QazAqparat - Qazaqstandyq Mıhaıl Kýkýshkın Parıj týrnıriniń ekinshi aınalymynda álemniń 9-ynshy raketkasy, amerıkalyq Djon Iznermen kúsh synasty, dep habarlaıdy QazAqparat tilshisi.
Ótken aptada Vena týrnıriniń jartylaı fınalyna deıin jetken qazaqstandyq tennısshi dúnıejúzilik reıtıngte 54-inshi orynǵa kóterilgen edi.
Venada M.Kýkýshkınniń, ásirese, álemniń onynshy raketkasy, bolgarııalyq Grıgor Dımıtrovty utýy qýantqan bolatyn. Endi, mine, Parıjde alǵashqy ondyqtyń taǵy bir ókilimen sheberlik baıqasty.
Bir aıta ketetin jaıt, Djon Iznerdiń 2010 jylǵy Ýımbldon týrnırinde frantsııalyq Nıkolıa Maıýmen tennıs tarıhynda eń uzaqqa, 11 saǵat 5 mınýtqa sozylǵan match ótkizip, qarsylasyn jeńgeni belgili. 33 jasar tájirıbeli tennısshiniń myqty qarsylas ekendigi anyq-ty.
Birinshi partııada D.Izner (Isner bolyp ta jazylady) birden breık jasap, 2:0 esebimen alǵa shyqty. Aqyry osy qarqynynan aıyryla qoıǵan joq - 6:3.
Ekinshi set áldeqaıda tartysty órbidi. Qarsylastar bir-birine jeńistik bermeı, partııa taǵdyry taı-breıkte sheshildi. Munda M.Kýkýshkın aıqyn basymdylyq kórsetti - 7:2.
Úshinshi, sheshýshi partııada esep 2:1 bolǵan mezette M.Kýkýshkın amerıkalyq tennısshiniń qos birdeı breık-poıntty paıdalanýyna múmkindik bergen joq. Kerisinshe esep 5:5 bolǵanda, qazaqstandyq sportshy breık-poınttan nátıje shyǵara almady. Bul joly da qarsylastar taı-breıkke deıin jetip, onda amerıkalyq tennısshi jeńistik bermedi - 7:1. Jalpy, ol match barysynda dop bergende 33 márte eıs jasady. Kýkýshkın eki eıspen shekteldi.
Tartysty kezdesý 2 saǵat 17 mınýtqa sozyldy.
D.Izner shırek fınalǵa shyǵý úshin álemniń 18-inshi raketkasy, reseılik Karen Hachanovpen kortqa shyǵady.
Eske sala keteıik, budan buryn M.Kýkýshkınniń júlde qory 5 mln AQSh dollaryna jýyqtaıtyn Parıj týrnıriniń ekinshi aınalymyna shyqqanyn jazǵan bolatynbyz.
