Tennıs: Kýkýshkın Rotterdam týrnıriniń ekinshi aınalymyna shyqty
ASTANA. QazAqparat - Qazaqstannyń birinshi raketkasy Mıhaıl Kýkýshkın Rotterdam (Nıderlandy) týrnıriniń alǵashqy aınalymynda kort ıesi Robın Hasemen kúsh synasty, dep habarlaıdy QazAqparat tilshisi.
R.Hase dúnıejúzilik reıtıngte 54-orynda bolsa, búgin odan bir saty tómendedi. Al qazaqstandyq tennısshi 55-ten 53-ke joǵarylady nemese oryndary almasty deýge bolady.
Birinshi partııada breıkter jasaı bilgen M.Kýkýshkın sol basymdylyǵynan aıyrylmaı, 6:2 esebimen jeńiske jetti.
Ekinshi set áldeqaıda tartysty órbip, qarsylastar óz geımderin alyp otyrdy. Esep 5:5 bolǵan mezette qazaqstandyq tennısshi birneshe breık-poıntty paıdalana almady. Aqyry bul partııa taı-breıkke ulasty - 6:6. Munda barynsha jınaqy oınaǵan M.Kýkýshkın 7:4 esebimen basym tústi.
Báseke 1 saǵat 30 mınýtqa sozyldy.
Qazaqstandyq sportshy shırek fınalǵa shyǵý úshin osy jarystyń 3-raketkasy bolyp tirkelgen, reıtıngte 12-oryndaǵy grekııalyq Stefanos Tsıtsıpas nemese bosnııalyq, 56-satyda turǵan Damır Djýmhýrdyń bireýimen talasady.
Álemniń 7-raketkasy, japonııalyq Keı Nısıkorı bastaǵan myqty tennısshiler qatysyp jatqan, júlde qory 2 mln AQSh dollarynan asatyn Rotterdem týrnıri 17 aqpanda márege jetedi.
Taǵy bir qazaqstandyq tennısshi, reıtıngte 321-satydaǵy Denıs Evseev Bangkok (Taıland) qalasynda ótip jatqan chellendjer týrnıriniń birinshi aınalymynda 238-oryndaǵy frantsııalyq Kalvın Emerıdi 6:2, 6:2 esebimen tize búktirdi. Ol ekinshi aınalymda germanııalyq Tobıas Kamkemen (205-oryn) sheberlik baıqasady.
Eske sala keteıik, budan buryn M.Kýkýshkınniń Rotterdam týrnırindegi qarsylasy anyqtalǵanyn, 21 jasar Aleksandr Býblıktiń Býdapesht týrnıriniń jeńimpazy atanyp, reıtıngte birden 28 satyǵa kóterilgenin jazǵan bolatynbyz.
A.Býblıktiń jeńisti jolyn jalǵastyratyndaı múmkindigi bar. Ol Frantsııanyń Sherbýr qalasynda ótip jatqan taǵy bir chellendjer jarysynda baq synaıdy. Osy týrnırdiń 10-raketkasy bolyp tirkelgen Býblık birden ekinshi aınalymnan bastap, onda ózinen bir jas úlkendigi bar, reıtıngte 226-oryndaǵy chehııalyq Zdenek Kolarmen kortqa shyǵady.
