Tennıs: Kýkýshkın Rotterdam týrnıriniń alǵashqy aınalymynan asa almady
NUR-SULTAN. QazAqparat – Qazaqstandyq Mıhaıl Kýkýshkın Rotterdam (Nıderlandy) ATP týrnıriniń alǵashqy aınalymynan asa almady, dep habarlaıdy QazAqparat tilshisi.
Dúnıejúzilik reıtıngte 67-orynda turǵan M.Kýkýshkın birinshi aınalymda álemniń 57-raketkasy, frantsııalyq Jıl Sımonmen kezdesti.
Qazaqstandyq sportshy negizgi dodaǵa irikteý saıystarynan keıin qosylǵan bolatyn.
Tartysty órbigen birinshi partııa taı-breıkke deıin jetip, onda J.Sımonnyń joly boldy – 7:6 (7:3).
Ekinshi sette breık jasaǵan qazaqstandyq tennısshi 3:0 esebimen alǵa ketti. Taǵy bir breık – 5:1. Budan keıin frantsııalyq tennısshi qaıyra breık jasap, esepti qysqartqanymen, M.Kýkýshkın ekinshi setpoıntyn paıdalana aldy – 6:3.
Úshinshi, sheshýshi partııany qazaqstandyq sportshy breıkpen bastaǵanymen, qarsylasy sol boıda qarymta qaıyrdy – 1:1. Esep 3:2 bolǵanda, Sımon taǵy bir breık jasap ketti. Aqyry ol osy basymdylyǵynan aıyrylǵan joq – 6:3.
Tartysty báseke 2 saǵat 42 mınýtqa sozyldy.
J.Sımon júlde qory 2,1 mln eýrodan asatyn jarystyń shırek fınalyna shyǵý úshin álemniń 9-raketkasy, frantsııalyq Gael Monfıs nemese reıtıngte 68-satydaǵy portýgalııalyq Joaý Soýzamen talasady.
Eske sala keteıik, budan buryn Aleksandr Býblıktiń Rotterdam týrnıriniń ekinshi aınalymyna shyǵyp, ıÝlııa Pýtıntsevanyń Sankt-Peterbýrgte jeńilip qalǵanyn, Federatsııa kýbogynda qazaqstandyq qyzdardyń Argentınamen oınaıtynyn jazǵan bolatynbyz.
A.Býblık shırek fınalǵa shyǵý úshin álemniń 15-raketkasy, reseılik Andreı Rýblevpen sheberlik baıqasady.
