Tennıs: Kýkýshkın Rolan Garros týrnıriniń ekinshi aınalymyna shyqty
NUR-SULTAN. QazAqparat – Qazaqstandyq Mıhaıl Kýkýshkın Rolan Garros týrnıriniń ekinshi aınalymyna shyqty, dep habarlaıdy QazAqparat tilshisi.
Dúnıejúzilik reıtıngte 88-orynda turǵan M.Kýkýshkın alǵashqy aınalymda osy «Úlken dýlyǵa» jarysynyń 14-raketkasy bolyp tirkelgen ıtalııalyq Fabıo Fonınımen kezdesti.
Bulardyń ekeýi de 1987 jylǵy, tájirıbeli oıynshylar edi.
Matchty sátti bastaǵan qazaqstandyq tennısshi birinshi partııada 3:1 esebimen alǵa shyqty. Qarsylasy tarazy basyn teńestirgenimen, M.Kýkýshkın taǵy bir breık jasady – 6:5. Sosyn setke dop bergende, múmkindigin múlt jibergen joq – 7:5.
Ekinshi sette ıtalııalyq sportshy breık jasap, 4:2 esebimen alǵa ketkenimen, Kýkýshkın ile-shala qarymta qaıyryp úlgerdi. Biraq Fonını taǵy bir breıkpen birge óz geımin de ala bildi – 6:3.
Úshinshi partııada da Fonını breık jasap ketti – 2:1. Sodan keıin esepti 5:3-ke jetkizdi. Degenmen qazaqstandyq tennısshi qatarynan úsh geımdi aldy – 6:5. Taı-breıkte de aıqyn basymdylyq kórsetti – 7:6 (7:1).
Tórtinshi sette M.Kýkýshkın qarsylasyn tas-talqan etti – 6:0.
Birshama tartysty ótken báseke 2 saǵat 55 mınýtqa sozyldy.
M.Kýkýshkın ekinshi aınalymda álemniń 105-raketkasy, ıspanııalyq Pedro Martınespen sheberlik baıqasady. Ol bastapqy kezdesýinde reıtıngte 193-satydaǵy aýstralııalyq Aleksandar Výkıchti 7:5, 6:4, 6:0 esebimen tize búktirdi.
Eske sala keteıik, budan buryn ıÝ.Pýtıntsevanyń Rolan Garros týrnırin jeńispen bastaǵanyn, A.Býblıktiń álemdegi úzdik 50 tennısshiniń qataryna kirgenin jazǵan bolatynbyz.
