Tennıs: Kýkýshkın Rımde irikteý saıystarynyń fınalyna shyqty
NUR-SULTAN. QazAqparat – Qazaqstandyq Mıhaıl Kýkýshkın Rım ATP týrnıri irikteý saıystarynyń fınalyna shyqty, dep habarlaıdy QazAqparat tilshisi.
Álemniń 90-raketkasy M.Kýkýshkın irikteý saıystarynyń jartylaı fınalynda reıtıngte 112-orynda turǵan japonııalyq Taro Denıelmen kortqa shyqty.
Qazaqstandyq tennısshi jekpe-jek barysynda basymdylyǵyn aıqyn baıqatyp, qarsylasyn 6:2, 6:2 esebimen jeńdi.
Báseke 1 saǵat 16 mınýtqa sozyldy.
M.Kýkýshkın irikteý dodasynyń fınalynda reıtıngte ózinen bir saty tómen turǵan germanııalyq Domınık Kepferdy tize búktirse, negizgi týrnırge ótedi. D.Kepfer búgin osy jarystyń ekinshi, álemniń 52-raketkasy, frantsııalyq Jıl Sımondy 7:5, 2:6, 6:3 esebimen utyp ketti.
Júlde qory 3,854 mln eýrony quraıtyn Rım masters týrnıri 14-22 qyrkúıek aralyǵynda bolmaqshy. Oǵan Qazaqstannyń birinshi, álemniń 54-raketkasy Aleksandr Býblık arnaıy shaqyrtý aldy. Onyń qarsylasy – álemniń 38-raketkasy, 2014 jylǵy US Open jarysynyń jeńimpazy, horvatııalyq Marın Chılıch.
Áıelder arasyndaǵy osy týrnırde Qazaqstannyń birinshi jáne ekinshi raketkalary Elena Rybakına men ıÝlııa Pýtıntseva baq synaıdy.
Álemniń 17-inshi, jarystyń 10-raketkasy E.Rybakına reıtıngte 29-orynda turǵan reseılik Ekaterına Aleksandrovamen kortqa shyǵady. E.Aleksandrova qazaqstandyq tennısshini bıyl Shenchjen (Qytaı) týrnıriniń fınalynda jáne Tsıntsınnatı dodasynyń alǵashqy aınalymynda utqan bolatyn. Endi qarymta qaıtarar kez keldi.
Bıyl US Open týrnırinde tabysty óner kórsetip, shırek fınalǵa deıin jetken álemniń 35-raketkasy ıÝ.Pýtıntseva reıtıngte 48-oryndaǵy shvetsııalyq Rebekka Petersonmen kezdesedi. R.Peterson budan bir jyl buryn Qytaıdaǵy Nanchan jarysynyń fınalynda E.Rybakınany súrindirgen edi.
Eske sala keteıik, budan buryn M.Kýkýshkınniń Rım jarysynyń irikteý saıysyn jeńispen bastaǵanyn, qazaqstandyq tennısshiniń Býharestegi týrnırdiń chempıony atanǵanyn jazǵan bolatynbyz.
