Tennıs: Kýkýshkın Monte-Karlo týrnıriniń úshinshi aınalymyna shyǵa almady
NUR-SULTAN. QazAqparat - Qazaqstannyń birinshi, álemniń 42-raketkasy Mıhaıl Kýkýshkın Monte-Karlo (Monako) týrnıriniń ekinshi aınalymynda grekııalyq Stefanos Tsıtsıpaspen kúsh synasty, dep habarlaıdy QazAqparat tilshisi.
Júlde qory 5,5 mln eýrodan asatyn masters jarysynyń 6-raketkasy bolyp tirkelgen 20 jasar grekııalyq sportshy dúnıejúzilik reıtıngte 8-satyda turǵan-dy.
Birinshi sette esep 4:3 bolǵan mezette S.Tsıtsıpas breık jasap ketti. Sodan keıin óz geımin múlt jibergen joq - 6:3.
Ekinshi partııada alǵashqy eki geımde qos tennısshiniń de breık jasaıtyndaı múmkindigi boldy. Degenmen grekııalyq sportshy breıkpen alǵa shyqty - 2:1. Esesine ol altynshy geımde jıi qatelesip, Kýkýshkınniń breık jasaýyna jol berip qoıdy - 3:3. Budan keıin qazaqstandyq tennısshi dop bergende, óz múmkindigin paıdalana almady - 3:4. Degenmen qaıyra breık jasap, tarazy basyn teńestirdi - 4:4. Esep 5:5 bolǵanda, Tsıtsıpas breıkke qol jetkizdi. Aqyry ol 7:5 esebimen jeńiske jetti.
Birshama tartysty órbigen báseke 1 saǵat 43 mınýtqa sozyldy.
S.Tsıtsıpas shırek fınalǵa shyǵý úshin osy týrnırdiń onynshy, álemniń 14-raketkasy, reseılik Danııl Medvedevpen sheberlik baıqasady.
Eske sala keteıik, budan buryn M.Kýkýshkınniń Monte-Karlo týrnırin sátti bastaǵanyn jazǵan bolatynbyz.
Taǵy bir qazaqstandyq, álemniń 100-raketkasy Aleksandr Býblık Meksıkadaǵy San-Lýıs Potosı chellendjer týrnırine qatysýda. 1-raketka bolyp tirkelgen A.Býblık jarysty ekinshi aınalymnan bastap, reıtıngte 322-oryndaǵy amerıkalyq Kevın Kıngpen kortqa shyǵady.
