Tennıs: Kýkýshkın men Pýtıntsevanyń Rım týrnırindegi qarsylastary anyqtaldy
NUR-SULTAN. QazAqparat - Qazaqstannnyń birinshi raketkalary Mıhaıl Kýkýshkın men ıÝlııa Pýtıntsevanyń Rım týrnırindegi qarsylastary anyqtaldy, dep habarlaıdy QazAqparat tilshisi.
Júlde qory 5,2 mln eýrodan asatyn erler arasyndaǵy Rım masters týrnıri 19 mamyrda márege jetedi.
Búgin irikteý saıystary bastalatyn iri jarystyń alǵashqy aınalymynda álemniń 40-raketkasy Mıhaıl Kýkýshkın reıtıngte 32-orynda turǵan serbııalyq Laslo Deremen kúsh synasady. Ony utsa, álemniń 17-raketkasy, grýzııalyq Nıkoloz Basılashvılı nemese reıtıngte 36-satydaǵy majarstandyq Marton Fýchovıchtiń birimen jolyǵady.
Týrnırge álemniń birinshi raketkasy, serbııalyq Novak Djokovıch bastaǵan myqtylar qatysady. Ótken jyly bul týrnırde álemniń 2-raketkasy, ıspanııalyq Rafael Nadal úzdik shyqqan bolatyn.
Áıelder arasyndaǵy Rım týrnırinde álemniń 43-raketkasy ıÝlııa Pýtıntseva betashar kezdesýin reıtıngte 26-satydaǵy ýkraınalyq Lesıa Tsýrenkomen ótkizedi. Ony jeńgen jaǵdaıda álemniń 2-raketkasy, chehııalyq Petra Kvıtovamen kortqa shyǵady.
Bul jarysta da álemniń birinshi raketkasy, japonııalyq Naomı Osaka bastaǵan mańdaıaldy tennısshiler baq synaıdy. Ótken jyly bul týrnırde ýkraınalyq Elına Svıtolına jeńimpaz atanǵan edi.
Eske sala keteıik, budan buryn Zarına Dııastyń Japonııadaǵy Fýkýoka, Dmıtrıı Popko men Aleksandr Nedovesovtiń Qazaqstandaǵy Shymkent týrnıriniń jartylaı fınalyna shyqqanyn jazǵan bolatynbyz.
Al Galına Voskoboeva juptyq synda Madrıd týrnıriniń fınalyna shyǵa almaı qaldy.
