Tennıs: Kýkýshkın men Býblık US Open týrnıriniń ekinshi aınalymyna shyqty
NUR-SULTAN. QazAqparat - Qazaqstandyq tennısshiler Mıhaıl Kýkýshkın men Aleksandr Býblık AQSh ashyq chempıonatynyń ekinshi aınalymyna shyqty, dep habarlaıdy QazAqparat tilshisi.
Dúnıejúzilik reıtıngte 47-orynda turǵan M.Kýkýshkın álemniń 10-raketkasy, ıspanııalyq Roberto Baýtısta-Agýtpen kezdesti.
Qarsylastar osyǵan deıin tórt márte joldary toqaılasyp, sonyń bárinde de R.Baýtısta-Agýttyń mereıi ústem bolǵan eken.
Birinshi partııada breıkke qol jetkizgen ıspanııalyq sportshy jeńiske jetti – 6:3.
Esesine ekinshi sette qos birdeı breık jasaǵan qazaqstandyq tennısshi 5:0 esebimen alǵa ketti. Ol osy basymdylyǵynan aıyrylǵan joq – 6:1.
Úshinshi partııada taǵy bir breık jasaǵan M.Kýkýshkın óz múmkindigin múlt jibermedi – 6:4.
Tórtinshi sette ıspanııalyq sportshy breıkpen alǵa shyqty – 3:1. Aqyry sony ýysynan shyǵarmady – 6:3.
Besinshi, sheshýshi partııada R.Baýtısta-Agýt breık jasap ketti – 2:1. Degenmen M.Kýkýshkın de qarymta qaıtardy – 2:2. Ispanııalyq tennısshi taǵy breık jasaǵanymen, Mıhaıl matchty jeńispen támamdaı bildi – 6:3.
M.Kýkýshkın ekinshi aınalymda reıtıngte 105-satydaǵy aýstralııalyq Alekseı Popyrınmen sheberlik baıqasady.
Álemniń 75-raketkasy A.Býblık reıtıngte 232-oryndaǵy kolýmbııalyq Santıago Hıraldomen kezdesti.
Birinshi partııany S.Hıraldo óz esebine jazdy – 6:2.
Al ekinshi sette A.Býblık qarsylasyna birde-bir geım bergen joq – 6:0.
Úshinshi partııada esep 5:5 bolǵan mezette qazaqstandyq sportshy breık jasaı aldy – 7:5.
Tórtinshi sette ol 2:2 bolǵannan keıin taǵy bir breıkke qol jetkizdi. Biraq qarsylasy da qarap qalmaı, tarazy basyn teńestirip qana qoıǵan joq – 6:3.
Sheshýshi, besinshi partııada A.Býblık 3:0 esebimen alǵa shyqty. S.Hıraldo esepti teńestire alǵanymen, qazaqstandyq tennısshi sheberliginiń basym ekenin baıqatty – 6:4.
Qos tartysty báseke de 3 saǵat 18 mınýtqa sozyldy.
A.Býblıktiń kelesi qarsylasy – álemniń 4-raketkasy, aýstrııalyq Domınık Tım nemese reıtıngte 87-oryndaǵy ıtalııalyq Tomas Fabbıano.
Eske sala keteıik, budan buryn Zarına Dııastyń álemniń 2-raketkasyna ese jibergenin jazǵan bolatynbyz.
Sol sekildi Elena Rybakına chehııalyq Karolına Mýhovadan 4:6, 4:6 esebimen utylyp, bastapqy aınalymnan asa almady.
Áıelder arasynda Qazaqstannyń birinshi, álemniń 39-raketkasy ıÝ.Pýtıntseva reıtıngte 78-oryndaǵy amerıkalyq Medıson Brenglmen kortqa shyǵady.
