Tennıs: Kýkýshkın men Býblık Aýstralııa chempıonatynyń fınalyna óte almady
NUR-SULTAN. QazAqparat – Qazaqstandyqtar Mıhaıl Kýkýshkın men Aleksandr Býblık juptyq synda Aýstralııa ashyq chempıonatynyń fınalyna óte almady, dep habarlaıdy QazAqparat tilshisi.
Qazaqstandyq jup jartylaı fınalda osy týrnırde 11-raketka bolyp tirkelgen amerıkalyq Radjıv Ram men ulybrıtanııalyq Djo Solsberımen kortqa shyqty.
Birinshi sette qazaqstandyqtar basymdylyq kórsetti – 6:4.
Ekinshisinde qarsylastary ese qaıyrdy – 6:3.
Úshinshi, sheshýshi partııada qazaqstandyqtar breıkpen alǵa shyqty – 2:1. Alaıda amerıkalyq pen ulybrıtanııalyq tennısshi de qalyspaı, A.Býblıktiń dop bergende qateleskenin paıdalanyp, qaıyra breık jasap, sosyn óz geımderin alyp, tarazy basyn teńestirip ketti. Taǵy bir breıkten keıin R.Ram men D.Solsberı matchty jeńispen aıaqtaı bildi – 6:4.
Báseke 1 saǵat 51 mınýtqa sozyldy.
Osylaısha Aýstralııa ashyq chempıonatynda sensatsııa jasap, tamasha óner kórsetken M.Kýkýshkın men A.Býblık fınalǵa sál qalǵanda, súrindi. Degenmen olar alǵash ret Qazaqstan tarıhynda erler arasynda «Úlken dýlyǵa» týrnıriniń jartylaı fınalyna shyqty. Aldaǵy dúısenbide jańartylatyn álemdik reıtıngte qazaqstandyqtar juptyq synda reıtıngte kúrt kóteriletin bolady.
Eske sala keteıik, budan buryn Kýkýshkın men Býblıktiń Aýstralııa ashyq chempıonatynyń jartylaı fınalyna shyqqanyn jazǵan bolatynbyz.
