Tennıs: Kýkýshkın Marsel týrnıriniń shırek fınalyna shyqty
ASTANA. QazAqparat - Qazaqstannyń birinshi, álemniń 50-raketkasy Mıhaıl Kýkýshkın Marsel (Frantsııa) týrnıriniń ekinshi aınalymynda kanadalyq Denıs Shapovalovpen kúsh synasty, dep habarlaıdy QazAqparat tilshisi.
M.Kýkýshkın 31 jastaǵy tájirıbeli tennısshi bolsa, álemniń 25-raketkasy D.Shapovalov bıyl ǵana 20-ǵa tolady.
Oıyndy sátti bastaǵan qazaqstandyq tennısshi birinshi partııany 6:4 esebimen utty.
Tartysty ótken ekinshi set 6:6 bolyp, taı-breıkke ulasty. Ony mınıbreıkpen bastaǵan M.Kýkýshkın 3:0 esebimen alǵa shyqty. Aqyry jeńisti ýysynan shyǵarǵan joq - 7:4.
Báseke 1 saǵat 25 mınýtqa sozyldy.
Júlde qory 668 485 eýroǵa baǵalanǵan týrnırdiń shırek fınalynda Mıhaıl Kýkýshkın álemniń 48-raketkasy, ıtalııalyq Matteo Berrettını nemese reseılik, reıtıngte 115-oryndaǵy Andreı Rýblevtiń birimen kortqa shyǵady.
Qazaqstandyq tennısshiler Denıs Evseev pen Aleksandr Nedovesov Bangkok (Taıland) qalasynda ótip jatqan chellendjer týrnırinde qarsylastaryna ese jiberdi.
Taǵy bir qazaqstaandyq Aleksandr Býblık Bergamo (Italııa) jarysynda baq synaýda.
Eske sala keteıik, budan buryn M.Kýkýshkınniń reıtıngte úzdik elýdikke engenin jáne Marsel týrnıriniń ekinshi aınalymyna shyqqanyn jazǵan bolatynbyz.
