Tennıs: Kýkýshkın Marsel týrnıriniń fınalynda jeńilip qaldy
ASTANA. QazAqparat - Qazaqstannyń birinshi raketkasy Mıhaıl Kýkýshkın Marsel týrnıriniń fınalynda grekııalyq Stefanos Tsıtsıpaspen kúsh synasty, dep habarlaıdy QazAqparat tilshisi.
Osy jarystyń birinshi raketkasy bolyp tirkelgen 20 jastaǵy S.Tsıtsıpas álemdik reıtıngte 12-orynda bolsa, 31 jastaǵy qazaqstandyq tennısshi 50-satyda edi.
Tartysty órbigen matchtyń birinshi partııasynda grekııalyq sportshy 7:5 esebimen jeńiske jetti.
Ekinshi sette breıkke qol jetkizgen qazaqstandyq tennısshi 4:2 esebimen alǵa shyqty. Sodan keıin de breık jasaıtyndaı múmkindigi boldy. Esep 5:4 bolyp, M.Kýkýshkın setke dop bergen kezde qarsylasy breık jasap, tarazy basyn teńestirip ketti. Aqyry partııa taı-breıkke ulasty - 6:6. Esep 5:5 bolǵanda S.Tsıtsıpas mınıbreık jasaı aldy. Aqyry ol jeńis núktesin qoıdy - 7:5.
Tartysty báseke eki saǵatqa sozyldy.
Osylaısha grekııalyq sportshy júlde qory 744 010 eýroǵa baǵalanǵan Marsel týrnıriniń chempıony atandy.
M.Kýkýshkınniń sońǵy básekege deıin jetýin de jaqsy tabys deýge bolady. Qazaqstandyq tennısshi buǵan deıin 2010 jyly Sankt-Peterbýrg týrnıriniń jeńimpazy atanǵan edi. Bul - onyń sporttyq jolyndaǵy jalǵyz tıtýly.
Eske sala keteıik, budan buryn reıtıngte úzdik elýlikke engen M.Kýkýshkın Marsel týrnırin sátti bastady. Sosyn jarystyń shırek, jartylaı fınalyna jáne sońǵy básekege joldama aldy.
Sondaı-aq M.Kýkýshkınniń Dýbaı týrnırindegi qarsylasy anyqtaldy. Onda ol alǵashqy aınalymda álemniń 13-raketkasy, horvatııalyq Borna Chorıchpen sheberlik baıqasady.
