Tennıs: Kýkýshkın Marsel týrnıriniń alǵashqy aınalymynan asa almady
NUR-SULTAN. QazAqparat – Qazaqstandyq Mıhaıl Kýkýshkın Marsel (Frantsııa) ATP týrnırinde jeńilip qaldy, dep habarlaıdy QazAqparat tilshisi.
Álemniń 69-raketkasy M.Kýkýshkın alǵashqy aınalymda reıtıngte ózinen on saty tómen turǵan frantsııalyq Per-ıÝg Erbermen kezdesti.
Tartysty órbigen birinshi partııa taı-breıkke deıin jetip, onda Erberdiń asyǵy alshysynan tústi – 7:6 (7:4).
Ekinshi sette esep 4:4 bolǵan mezette frantsııalyq sportshy breık jasap ketti. Sodan keıin matchty jeńispen aıaqtady – 6:4.
Báseke 1 saǵat 48 mınýtqa sozyldy.
Ótken jyly osy týrnırde M.Kýkýshkın tabysty óner kórsetip, fınalǵa deıin jetken bolatyn.
Taǵy bir qazaqstandyq Aleksandr Býblık osy (júlde qory – 769 670 eýro) jarystyń shırek fınalyna shyǵý úshin álemniń 20-synshy, osy dodanyń 6-raketkasy, frantsııalyq Benýa Permen synǵa túsedi.
Eske sala keteıik, budan buryn Elena Rybakınanyń Dýbaıda Aýstralııa chempıonyn utqanyn jazǵan bolatynbyz.
