Tennıs: Kýkýshkın Marrakesh týrnırine qatyspaıtyn boldy
NUR-SULTAN. QazAqparat - Qazaqstannyń birinshi, álemniń 44-raketkasy Mıhaıl Kýkýshkın Marrakesh (Marokko) týrnırine qatyspaıtyn boldy, dep habarlaıdy QazAqparat tilshisi.
Júlde qory 524 340 eýroǵa baǵalanǵan atalmysh týrnır 8-14 sáýir aralyǵynda ótedi. Jarystan M.Kýkýshkınnen basqa ıspanııalyq Pablo Karreno-Býsta, kanadalyq Felıks Oje-Alıassım jáne polıak Hýbert Hýrkachtyń tys qalǵany belgili boldy. Onyń aldynda Maıamıde arqasynan alǵan jaraqatqa baılanysty bosnııalyq Davıd Djýmhýr týrnırge qatysýdan bas tartqan bolatyn.
Ótken jyly bul aıtýly dodada ıspanııalyq Pablo Andýhardyń baǵy janyp, chempıon atanǵan edi.
Eske sala keteıik, budan buryn Aleksandr Býblıktiń Monterreı chellendjer týrnırin sátti bastap, shırek fınalyna shyqqanyn jazǵan bolatynbyz. Ol jartylaı fınalǵa shyǵý úshin álemniń 91-raketkasy, ıspanııalyq Felısıano Lopespen talasady.
Taǵy bir qazaqstandyq tennısshi Zarına Dııas Monterreı týrnıriniń (júlde qory - 250 myń AQSh dollary) ekinshi aınalymyna shyqqanymen, Belarýs eliniń ókili Vıktorııa Azarenkodan jeńilip qaldy.
