Tennıs: Kýkýshkın Los Kabos týrnıriniń ekinshi aınalymyna shyqty
NUR-SULTAN. QazAqparat – Qazaqstandyq Mıhaıl Kýkýshkın Los Kabos (Meksıka) ATP týrnırin sátti bastady, dep habarlaıdy QazAqparat tilshisi.
Qazaqstannyń birinshi, álemniń 45-raketkasy M.Kýkýshkın alǵashqy aınalymda reıtıngte 92-orynda turǵan bosnııalyq Damır Djýmhýrmen kúsh synasty.
Birinshi partııada qazaqstandyq tennısshi jaqsy oıyn órnegin kórsete bildi – 7:5.
Ekinshi sette esep 2:1 bolǵan mezette M.Kýkýshkın breık jasap, sosyn óz geımin aldy – 4:1. Aqyry ol matchty taǵy bir breıkpen túıindedi – 6:2.
Báseke 1 saǵat 36 mınýtqa sozyldy.
M.Kýkýshkın ekinshi aınalymda álemniń 58-raketkasy, ulybrıtanııalyq Kemeron Norrı nemese reıtıngte 111-satydaǵy frantsııalyq Gregýar Barrerdiń bireýimen sheberlik baıqasady.
Júlde qory 850 myń AQSh dollarynan asatyn Los Kabos týrnıri 5 tamyzda márege jetedi.
Eske sala keteıik, budan buryn Aleksandr Býblıktiń Vashıngton týrnırin jeńispen bastaǵanyn jazǵan bolatynbyz.
