Tennıs: Kýkýshkın Istbýrn týrnıriniń jartylaı fınalyna shyqty
ASTANA. QazAqparat - Qazaqstannyń birinshi, álemniń 90-ynshy raketkasy Istbýrn týrnıriniń shırek fınalynda ulybrıtanııalyq Kaıl Edmýndpen kortqa shyqty, dep habarlaıdy QazAqparat tilshisi.
Osy týrnırde 2-inshi raketka bolyp tirkelgen, dúnıejúzilik reıtıngte 18-inshi orynda turǵan Edmýndpen kezdesý tartysty órbidi. Onyń ústine jarys Ulybrıtanııada ótip jatqannan keıin jankúıerler otandasyna qoldaý kórsetip otyrdy. Bul da sheshýshi tustarda áser etpeı qalǵan joq.
Tájirıbeli Kýkýshkın otyz jasta bolsa, 1995 jylǵy Edmýnd osynyń aldynda óziniń otandasy, álemniń burynǵy birinshi raketkasy Endı Marreıdi utqan bolatyn. Sondyqtan ulybrıtanııalyqtardyń oǵan úmit artýy zańdy.
Birinshi partııada esep 4:4 bolyp turǵan mezette Kýkýshkın breık jasap, alǵa shyqty. Alaıda ol osy setti utatyn múmkindikti paıdalana almaı, 5:7 esebimen ese jiberdi.
Ekinshi partııa basynda breık jasaǵan qazaqstandyq tennısshi 3:1 esebimen alda turdy. Aqyry osy basymdylyǵynan aıyrylmaı, taǵy bir breıkke qol jetkizip, setti jeńispen bitirdi - 6:3.
Úshinshi, sheshýshi sette Mıhaıl Kýkýshkın tartysty órbigen óz geıminde qarsylasynyń breık jasaýyna múmkindik bergen joq. Sosyn breık jasap, ózi dop bergende, qatelese qoıǵan joq - 3:0. Budan keıin Kýkýshkın ulybrıtanııalyq tennısshige esh jeńistik bermeı, 6:1 esebimen aıqyn basymdylyq kórsetti.
Tartysty báseke 2 saǵat 16 mınýtqa sozyldy. M.Kýkýshkın jartylaı fınalda Germanııa eliniń ókili, álemniń 67-inshi raketkasy Mısha Zverevpen sheberlik baıqasady.
Eske sala keteıik, budan buryn M.Kýkýshkınniń Istbýrn týrnıriniń shırek fınalyna shyqqanyn jazǵan bolatynbyz. Bul jarys, bir jaǵynan, aldaǵy aptada bastalatyn Ýımbldon týrnırine daıyndyq bolyp esepteledi.
