Tennıs: Kýkýshkın Hertogenbos týrnıriniń ekinshi aınalymyna shyqty
NUR-SULTAN. QazAqparat - Qazaqstannyń birinshi, álemniń 47-raketkasy Mıhaıl Kýkýshkın Hertogenbos (Nıderlandy) ATP týrnıriniń ekinshi aınalymyna shyqty, dep habarlaıdy QazAqparat tilshisi.
M.Kýkýshkın alǵashqy aınalymda reıtıngte 76-satyda turǵan ıtalııalyq Lorentso Sonegomen kezdesti.
Birinshi partııada ıtalııalyq sportshy 7:5 esebimen basymdylyq kórsetti.
Ekinshi sette breık jasaǵan qazaqstandyq tennısshi alǵa shyqty. Aqyry osy múmkindiginen aıyrylǵan joq - 6:4.
Úshinshi, sheshýshi partııada esep 1:1 bolǵan mezette M.Kýkýshkın breık jasaı aldy - 2:1. Sodan keıin de osy qarqynynan taımaı, matchty jeńispen túıindeı bildi - 6:4.
Tartysty báseke 2 saǵattan astam ýaqytqa sozyldy.
Júlde qory 711 275 eýroǵa baǵalanǵan, 16 maýsym kúni aıaqtalatyn Hertogenbos týrnıriniń ekinshi aınalymynda M.Kýkýshkın osy týrnırdiń segizinshi, álemniń 42-raketkasy, frantsııalyq Rıshar Gaskemen kortqa shyǵady.
Shymkent qalasynda 10 maýsym kúni bastalǵan chellendjer týrnıri ázirge Andreı Golýbev úshin ǵana sátti boldy. Qalǵan qazaqstandyq tennısshiler alǵashqy kúni-aq qarsylastaryna ese jiberip, jarys jolynan shyǵyp qaldy.
Reıtıngte 610-orynda turǵan A.Golýbev búgin álemniń 348-raketkasy, qytaılyq Ý Dımen kúsh synasyp, 6:2, 6:3 esebimen jeńiske jetti.
A.Golýbev ekinshi aınalymda álemniń 243-raketkasy, kanadalyq Stıven Dıaspen kortqa shyǵady.
Osy jarystyń 7-raketkasy bolyp tirkelgen taǵy bir qazaqstandyq Aleksandr Nedovesov reıtıngisi joǵary (194-oryn) bolǵandyqtan, dodany ekinshi aınalymnan bastaıdy. Ol 264-satydaǵy frantsııalyq Gleb Saharovtyń shamasyn baıqap kórmek.
Shymkent týrnıri de 16 maýsym kúni márege jetedi.
Eske sala keteıik, budan buryn Elena Rybakınanyń Hertogenbos týrnıriniń ekinshi aınalymyna shyqqanyn jazǵan bolatynbyz.
Dúnıejúzilik reıtıngte 135-orynda turǵan E.Rybakına álemniń 55-raketkasy, belgııalyq Elıson Van Eıtvankpen sheberlik baıqasady.
