Tennıs: Kýkýshkın Dýbaı týrnıriniń irikteý saıysyn sátti bastady
NUR-SULTAN. QazAqparat – Qazaqstandyq Mıhaıl Kýkýshkın Dýbaı ATP 500 týrnıriniń irikteý saıysyn sátti bastady, dep habarlaıdy QazAqparat tilshisi.
Álemniń 96-raketkasy M.Kýkýshkın bastapqy kezdesýin dúnıejúzilik reıtıngte 217-orynda turǵan frantsııalyq Maksım Janvemen ótkizdi.
Birinshi partııada qazaqstandyq tennısshi 7:5 esebimen basymdylyq kórsetse, ekinshisinde M.Janve ese qaıyrdy – 6:2.
Úshinshi, sheshýshi sette M.Kýkýshkın aıqyn basymdylyq kórsetti – 6:1.
Báseke 1 saǵat 53 mınýtqa sozyldy.
M.Kýkýshkın irikteý saıystarynyń fınalynda álemniń 162-raketkasy, ıtalııalyq Lorentso Djýstınony jeńse, negizgi týrnırge ótedi.
Qazaqstannyń birinshi, álemniń 44-raketkasy Aleksandr Býblık osy Dýbaı dodasynyń alǵashqy aınalymynda reıtıngte 59-satydaǵy japonııalyq Esıhoto Nısıokamen kúsh synasady. Dál osy tennısshini A.Býblık jýyrda Sıngapýr jarysynda utqan bolatyn.
Eske sala keteıik, budan buryn Denıs Evseevtiń juptyq synda Sankt-Peterbýrg týrnıriniń fınalyna shyqqanyn jazǵan bolatynbyz.
D.Evseev búgin reseılik Konstantın Kravchýkpen birge fınalda tartysty básekede nıderlandylyqtar Sem Verbık– Iesper de Iongke 1:6, 6:3, 5:10 esebimen ese jiberdi.
