Tennıs: Kýkýshkın Dýbaı týrnıriniń alǵashqy aınalymynan asa almady
ASTANA. QazAqparat - Qazaqstannyń birinshi, álemniń 88-inshi raketkasy Mıhaıl Kýkýshkın Dýbaı týrnıriniń birinshi aınalymynda grekııalyq Stefanos Tsıtsıpaspen kezdesti, dep habarlaıdy «QazAqparat» tilshisi.
Dúnıejúzilik reıtıngte M.Kýkýshkınnen alty saty joǵary turǵan, jıyrma jasqa bıyl tolatyn grekııalyq tennısshi birinshi partııada 6:2 esebimen basymdylyq kórsetti.
Ekinshi partııa áldeqaıda tartysty bolyp, taı-breıkke deıin jetti. Bul synda M.Kýkýshkın tabandylyq tanytyp, 7:6 (7:5) esebimen qarymta qaıyrdy.
Úshinshi, sheshýshi partııada esep 3:3 bolǵannan keıin S.Tsıtsıpas eki márte breık jasap, jeńiske jetti. Esep - 6:3.
Osylaısha 2 saǵat 15 mınýtqa sozylǵan kezdesýde tájirıbeli M.Kýkýshkın ózinen on bir jastaı kishi tennısshiden jeńilip qaldy.
Júlde qory 2,6 mln AQSh dollarynan asatyn Dýbaı týrnıri 3 naýryz kúni márege jetip, jeńimpaz anyqtalady.
Eske sala keteıik, taǵy bir qazaqstandyq tennısshi, álemniń 142-inshi raketkasy Aleksandr Býblık Akapýlko qalasynda ótip jatqan Meksıka ashyq chempıonatynyń negizgi týrnırine ótken bolatyn. Ol alǵashqy aınalymda dúnıejúzilik reıtıngte 199-ynshy satyda turǵan avstralııalyq Tanası Kokkınakıspen kúsh synasady.
